Xitay, malaysiyaning 11 neper Uyghurni qayturup bérishige narazi boldi

Muxbirimiz irade
2018-10-12
Share

Malaysiya hökümitining tutqundiki 11 neper Uyghur musapirni qoyup bérip türkiyege yolgha sélishi xitay hökümitini qattiq bi'aram qildi.

Roytérs agéntliqining bu heqtiki xewiridin melum bolushiche, jüme küni xitay tashqi ishlar ministirliqi bayanat élan qilip, malaysiya hökümitining qararini tenqidligen.

Bayanatta malaysiya hökümitining xitayning ularni qayturup bérish heqqidiki telipige pisent qilmighanliqi tilgha élinip: "Biz malaysiya hökümitini bizning bu heqtiki endishilirimizge köngül bölidu, dep oylighan iduq. Bu kishiler hemmisi xitay puqrasi idi. Biz ularning üchinchi döletke ewetilishige qet'iy qarshi turimiz" déyilgen.

Malaysiya hökümiti xitay hökümitining 11 neper Uyghur musapirni qayturup bérish heqqidiki küchlük telipige qarimay, sotqa chiqishni kütüp turghan bu Uyghurlar üstidiki barliq eyibnamilerning bikar qilip, ularni erkinlikke chiqarghan idi. Ularning erkinlikke chiqirilishi chet'ellerdiki Uyghur jama'iti we kishilik hoquq organlirini qattiq söyündürgen.

Jüme küni, dunya Uyghur qurultiyi bu heqte mexsus bayanat élan qilip, malaysiya hökümitining qararini qarshi aldi. Biraq, dunya Uyghur qurultiyi re'isi dolqun eysa qararni qarshi élish bilen birge yene "Tayland we malaysiya qatarliq döletler xitayning zulumidin qutulush üchün bu döletlerge qéchip kelgen Uyghur musapirlarni xelq'ara musapirlar qanunlirigha bina'en bir terep qilip, ularning üchinchi döletke salamet orunlishishigha kapaletlik qilishi kérek", dep eskertti.

Bayanatta éytilishiche, hazir taylandtiki tutup turush ornida tayland hökümitining qararini kütüp yatqan 50 etrapida Uyghur bar bolup, bu Uyghurlarning tutup turulush waqtining bundaq uzun sürülüp kétishi xelq'aradiki munasiwetlik musapirlar qanunlirigha xilap iken.

Dolqun eysa ependi sözide, herqaysi hökümet we organlarning xitay hökümitining qattiq ziyankeshlik qilishigha uchrawatqan Uyghur musapirlar mesilisige alahide mu'amile qilishi kéreklikini bildürüp, bashqa döletlermu "Gérmaniye we shiwétsiyege oxshash Uyghur musapirlarni qayturmasliq heqqide qarar chiqirishi kérek", dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet