Малайсия баш министири: «уйғурлар қоюп берилди, чүнки улар һечқандақ хаталиқ садир қилмиған»

Мухбиримиз әркин
2018-10-15
Елхәт
Пикир
Share
Принт

Малайсия баш министири муһәммәд махатир, дүшәнбә күни өткән йили тайланд түрмисидин малайсияға қечип өткән 11 нәпәр уйғур мусапирниң қоюп берилгәнлики, чүнки уларниң һечқандақ хаталиқ садир қилмиғанлиқини билдүргән.

Малайсия һөкүмити өткән һәптә хитайниң юқириқи 11 нәпәр уйғурни қайтуруп бериш тәлипини рәт қилип, уларни түркийәгә йолға салған. Малайсия һөкүмитиниң қарари кишилик һоқуқ тәшкилатлириниң алқишиға еришкән иди.

Ройтерс агентлиқиниң хәвәр қилишичә, махатир дүшәнбә күни малайсия парламентида мухбирларға мәзкур мәсилә һәққидә сөз қилип: «улар бу дөләттә һечқандақ хаталиқ садир қилмиди. Шуңа, улар қоюп берилди» дегән.

Муһәммәд махатир бу йил 5‏-айда өткүзүлгән малайсия парламент сайлимида ғәлибә қилип һөкүмәт қурған. У вәзипигә олтурупла сабиқ малайсия баш министири нәҗип разақниң хитай билән имзалиған 20 милярд долларлиқ ул-әслиһәләр қурулуш келишимини бикар қилған. Униң қарари хитайниң наразилиқини қозғиған иди. Ройтерсниң хәвиридә баян қилинишичә, махатир һөкүмитиниң арқидинла 11 нәпәр уйғур мусапирини қоюп бериши хитайниң техиму наразилиқини қозғайдикән.

Малайсия һөкүмити 11 нәпәр уйғур мусапириниң мәсилисидә хәлқара җәмийәт, малайсиядики кишилик һоқуқ тәшкилатлири вә ислами җамаәтләрниң қаттиқ бесимиға учриған. Улар хитай һөкүмити бир милйондин артуқ уйғурни йиғивелиш лагерлириға қамап, уйғурларниң мәдәнийити, диний етиқади, турмуши вә тәрәққиятиға еғир бузғунчилиқ қиливатқан бир мәзгилдә уларни хитайға қайтуруп беришниң өлүмгә тутуп бериш билән баравәр икәнликини агаһландурған. Хитай ташқи ишлар министирлиқи өткән җүмә күни малайсияға наразилиқ билдүрүп, униң 11 нәпәр уйғурни қоюп берип түркийәгә йолға салғанлиқиға «қәтий қарши туридиғанлиқи» ни билдүргән иди.

Пикирләр (0)
Share
Толуқ бәт