Malaysiya bash ministiri: "Uyghurlar qoyup bérildi, chünki ular héchqandaq xataliq sadir qilmighan"

Muxbirimiz erkin
2018-10-15
Élxet
Pikir
Share
Print

Malaysiya bash ministiri muhemmed maxatir, düshenbe küni ötken yili tayland türmisidin malaysiyagha qéchip ötken 11 neper Uyghur musapirning qoyup bérilgenliki, chünki ularning héchqandaq xataliq sadir qilmighanliqini bildürgen.

Malaysiya hökümiti ötken hepte xitayning yuqiriqi 11 neper Uyghurni qayturup bérish telipini ret qilip, ularni türkiyege yolgha salghan. Malaysiya hökümitining qarari kishilik hoquq teshkilatlirining alqishigha érishken idi.

Roytérs agéntliqining xewer qilishiche, maxatir düshenbe küni malaysiya parlaméntida muxbirlargha mezkur mesile heqqide söz qilip: "Ular bu dölette héchqandaq xataliq sadir qilmidi. Shunga, ular qoyup bérildi" dégen.

Muhemmed maxatir bu yil 5‏-ayda ötküzülgen malaysiya parlamént saylimida ghelibe qilip hökümet qurghan. U wezipige olturupla sabiq malaysiya bash ministiri nejip razaqning xitay bilen imzalighan 20 milyard dollarliq ul-esliheler qurulush kélishimini bikar qilghan. Uning qarari xitayning naraziliqini qozghighan idi. Roytérsning xewiride bayan qilinishiche, maxatir hökümitining arqidinla 11 neper Uyghur musapirini qoyup bérishi xitayning téximu naraziliqini qozghaydiken.

Malaysiya hökümiti 11 neper Uyghur musapirining mesiliside xelq'ara jem'iyet, malaysiyadiki kishilik hoquq teshkilatliri we islami jama'etlerning qattiq bésimigha uchrighan. Ular xitay hökümiti bir milyondin artuq Uyghurni yighiwélish lagérlirigha qamap, Uyghurlarning medeniyiti, diniy étiqadi, turmushi we tereqqiyatigha éghir buzghunchiliq qiliwatqan bir mezgilde ularni xitaygha qayturup bérishning ölümge tutup bérish bilen barawer ikenlikini agahlandurghan. Xitay tashqi ishlar ministirliqi ötken jüme küni malaysiyagha naraziliq bildürüp, uning 11 neper Uyghurni qoyup bérip türkiyege yolgha salghanliqigha "Qet'iy qarshi turidighanliqi" ni bildürgen idi.

Toluq bet