Lagérlar munazire qiliniwatqan malaysiyada "Shinjang sen'et ömiki" oyun qoydi

Muxbirimiz erkin
2019-12-23
Share

Uyghur rayonidiki lagérlar qattiq munazire qiliniwatqan malaysiyada "Shinjang sen'et ömiki" ning oyun qoyush pa'aliyiti ötküzülgen.

Malaysiyada Uyghur rayonidiki lagérlar munazire qiliniwatqan shundaqla 20 dek musulman dölitining rehbiri malaysiyagha toplan'ghan mezgilde xitayning "Shinjang sen'et ömiki" ni malaysiyagha élip chiqishi diqqet qozghidi.

Türkiye, qatar, iran, malaysiya qatarliq 20 dek musulman dölitining rehbiri 18‏-dékabir küni dunyadiki musulmanlar duch kéliwatqan mesililerni muzakire qilish üchün ku'ala-lampurda yighin ötküzgen. "Shinjang sen'et ömiki" ning del mushu mezgilde malaysiyada oyun qoyushining tasadipiyliq yaki pilanliq orunlashturush ikenliki melum emes.

Yighinning harpisida kishilik hoquq teshkilatliri musulman rehberlirining bu yighinda Uyghur mesilisini muzakire qilishini telep qilghan. Shuning bilen bir waqitta yene ötken hepte xitayning malaysiyadiki bash elchisi bey tyenning malaysiya taratqulirida maqale élan qilip, gherb taratqulirini Uyghurlar heqqide "Yérim yamidaq xewerlerni tarqitish" bilen eyiblishi shundaqla xitaydiki az sanliq milletlerning "Ewzel siyasiy‏-ijtima'iy parawanliqqa érishiwatqanliqi" ni ilgiri sürüshi malaysiyada munazire qozghap, xitay bash elchisi qattiq tenqidige uchrighan idi.

Xitaydiki "Junggo xewerliri" torining bildürüshiche, "Shinjang sen'et ömiki" bu sepiride malaysiyaning ku'ala-lampur, ku'antan qatarliq chong sheherliride oyun qoyghan. Bu jeryanda 12 muqamning "Julasi", "Mudenxan", "Dolan meshripi", "Texse ussuli", qazaqlarning "Qiz qowar" qatarliq klassik sen'et nomurlirini orundap, "Shinjang xelqining hayatqa bolghan qiziqishi we intilishishini ipadiligen." lékin Uyghur kishilik hoquq teshkilatlirining qarishiche, bu pa'aliyet xitayning Uyghur rayonidiki "Medeniyet qirghinchiliqi" ni perdazlash üchün élip bériwatqan teshwiqatining bir parchisi iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet