Enwer ibrahimning béyjingda shi jinpinggha yaxshichaq bolushi diqqet qozghimaqta

Xitay bashqurushidiki “Shinxu'a agéntliqi” ning 7-noyabirdiki xewiride éytilishiche, malaysiya bash ministiri enwer ibrahim shu küni béyjinggha yétip kelgen hemde xitay re'isi shi jinping bilen söhbetleshken.

Xewerde éytilishiche, shi jinping söhbet jeryanida enwer ibrahim bashchiliqidiki malaysiya hökümitining xitay bilen bolghan dostluq munasiwitige nahayiti yuqiri baha bergen. Shuningdek “Ikki terep otturisidiki bu xil hörmet we dostluq öz nöwitide jungxu'a medeniyiti bilen islam medeniyitining bir-biridin örnek élip güllineleydighanliqini namayan qildi” dégen.

Enwer ibrahimmu shi jinpingni “Insaniyet medeniyitining tereqqiyati we xelq turmushining yaxshilinishigha ghayet zor töhpe qoshti” dep medhiyeligen.

Halbuki, Uyghur élide 2016-yilidin bashlan'ghan irqiy qirghinchiliqta Uyghur jem'iyitidiki wasitilik yaki biwasite halda islam dinigha chétishliq bolghan hemmila nerse “Térrorluq we esebiylik” ning alametliri qatarida hujum nishanigha aylinip qalghan؛ islam dinigha munasiwetlik pa'aliyetlerge qatnashqan hemmila kishi “Qayta terbiyelesh” namidiki lagérlargha qamilip rohiy we jismaniy jehettin qabahetlik weyranchiliqqa duchar bolghan؛ Uyghurlarning milliy, diniy we medeniyet dunyasi pütünley yoqitilish qismitige duch kelgen idi. Del shundaq bolghanliqi üchün amérika hökümiti, shuningdek bir türküm gherb parlaméntliri Uyghurlar duch kéliwatqan zulumlarni “Irqiy qirghinchiliq” dep jakarlighan idi.

Melumki, pütün dunyagha shunche éniq delil-ispatliri bilen melum bolghan Uyghur qirghinchiliqi yéqinda del mushu enwer ibrahim bilen mehdi hesenning söhbet pirogrammisida tilgha élin'ghan. Enwer ibrahim “Men bu mesilide pütünley bashqiche qarashta” dégen hemde amérika hökümitini yalghan xewer tarqitish bilen eyibligen. Uyghur mesilisi bilen shunche zor tonushluqi bolghan, yene kélip bash ministir bolushtin ilgiriki yillarda Uyghurlar mesilisi heqqide küchlük bayanatlarni élan qilghan bu shexsning bash ministir bolghandin kéyinla bashqiche mewqege ötüwélishi, shu waqitta dunya miqyasida zor ghulghuligha seweb bolghanidi.

Dunya Uyghur qurultiyi (d u q)ning yéqinda bosniyening sarayéwo shehiride chaqirilghan 8-qurultiyi mezgilide “Malaysiya musulman yashlar herikiti” (ABIM)ning re'isi ehmed fahmi muhd shemsidin (Ahmad Fahmi Mohd Samsudin) radiyomiz ziyaritini qobul qilghanda, “Enwer ibrahimning bu xil mewqesi özgertilishi kérek dep qaraymiz” dégen.