Йеңи зеландийә һөкүмити “магнетиски қануни” ни қоллинишқа чақирилди

Уйғур дияридики ирқий қирғинчилиқ хәлқарада чоң темилардин болуватқан болуп, йеқинда йеңи зеландийә һөкүмитиму мушу мәсилә һәққидә “магнетиски қануни” ни иҗра қилишқа чақирилди.

“хитай һәққидики хәлқара парламентлар бирләшмиси” ниң тор бетидә елан қилинған очуқ мәктупта йеңи зеландийә парламентиниң әзалиридин луйиза вал вә саймон коннор бирликтә йеңи зеландийә баш министири җейсинда ардерн вә ташқи ишлар министири наная махутаға “бизниң әмди ‛магентиски қануни‚ни тонуштурушимиз зөрүр болуватиду” дегән. Мәлум болушичә, бу мәктуп австралийә һөкүмити өзлириниң мәзкур қанун лайиһәсини иҗра қилишни ойлишиватқанлиқини елан қилғандин кейинла оттуриға чиққан.

Мәктупта “хитай һөкүмити нөвәттә уйғурларға ирқий қирғинчилиқ қиливатқанлиқиниң көплигән пакитлири оттуриға чиқиватиду. Америка қатарлиқ дөләтләр бу қирғинчилиққа шерик әмәлдарларға җаза елан қиливатқанда бизниңму мушундақ бир қанун лайиһәсини қоллинишимиз зөрүр болуватиду” дейилиду.

Мәктупта йәнә алаһидә қилип йеңи зеландийәниңму дуня демократийәсини һимайә қилиш мәҗбурийитиниң барлиқи, хитай һөкүмити мушундақ ашкара һалда инсанийәткә қарши җинайәтләрни садир қиливатқанда йеңи зеландийә һөкүмитиниңму буниңға қарши қанун тәдбирлирини қоллиниши лазимлиқи тәкитлиниду.