Yéngi zélandiye hökümiti “Magnétiski qanuni” ni qollinishqa chaqirildi

Uyghur diyaridiki irqiy qirghinchiliq xelq'arada chong témilardin boluwatqan bolup, yéqinda yéngi zélandiye hökümitimu mushu mesile heqqide “Magnétiski qanuni” ni ijra qilishqa chaqirildi.

“Xitay heqqidiki xelq'ara parlaméntlar birleshmisi” ning tor bétide élan qilin'ghan ochuq mektupta yéngi zélandiye parlaméntining ezaliridin luyiza wal we saymon konnor birlikte yéngi zélandiye bash ministiri jéysinda ardérn we tashqi ishlar ministiri nanaya maxutagha “Bizning emdi ‛magéntiski qanuni‚ni tonushturushimiz zörür boluwatidu” dégen. Melum bolushiche, bu mektup awstraliye hökümiti özlirining mezkur qanun layihesini ijra qilishni oylishiwatqanliqini élan qilghandin kéyinla otturigha chiqqan.

Mektupta “Xitay hökümiti nöwette Uyghurlargha irqiy qirghinchiliq qiliwatqanliqining köpligen pakitliri otturigha chiqiwatidu. Amérika qatarliq döletler bu qirghinchiliqqa shérik emeldarlargha jaza élan qiliwatqanda bizningmu mushundaq bir qanun layihesini qollinishimiz zörür boluwatidu” déyilidu.

Mektupta yene alahide qilip yéngi zélandiyeningmu dunya démokratiyesini himaye qilish mejburiyitining barliqi, xitay hökümiti mushundaq ashkara halda insaniyetke qarshi jinayetlerni sadir qiliwatqanda yéngi zélandiye hökümitiningmu buninggha qarshi qanun tedbirlirini qollinishi lazimliqi tekitlinidu.