Kéngesh palata ezasi rubi'o aqsaray dölet xewpsizlik komitétida diniy erkinlik alahide meslihetchisi teyinleshni telep qilghan

Washin'gtondin muxbirimiz erkin teyyarlidi
2024.05.10

Amérika kéngesh palata ezasi marko rubi'o(Marco Rubio) yéqinda amérika prézidénti jow baydén'gha mektup yézip, uningdin aqsarayning dölet xewpsizlik komitétida xelq'ara diniy erkinlik alahide meslihetchisi teyinleshni telep qilghan.

Marko rubi'oning tekitlishiche, kommunist xitayning tibetler, falun'gongchilar we Uyghurlargha qaritilghan diniy basturushidin tartip, nikaragu'a, kuba, shimaliy koréyede xiristiyanlarning, iranda bahayilarning jazalinishighiche bolghan ishlarda, amérika ‍özining dunyadiki diniy erkinlikni qoghdash wediside dawamliq ching turidighanliqini qayta qeyt qilishi kérek iken. Marko rubi'oning ishxanisi 7-may küni élan qilghan bayanatta, marko rubi'oning pirézidént baydén'gha amérikaning wedisini qayta tekitlep, uni bosh qalghan bu orunni derhal toluqlashqa chaqirghanliqi qeyt qilinmaqta.

Bayanatta mundaq déyilgen: “Layaqetlik hem tejribilik birsini dölet xewpsizlik komitétida xelq'ara diniy erkinlik ishliri boyiche alahide meslihetchi teyinlesh dölitimizning bu négizlik kishilik hoquqqa bolghan béghini gewdilendürüpla qalmay, toqunush we muqimsizliqning asasliq sewebliridin birini hel qilishqa yardem bérish arqiliq dölet bixeterlikimizni kücheytidu.”

Rubi'oning pirézidént baydén'gha yazghan mektupi, amérika xelq'ara diniy erkinlik komitétining yéqinda yilliq doklat élan qilip, amérika hökümitidin amérikaning “Uyghur kishilik hoquq siyasiti qanuni”, “Uyghur mejburiy emgikining aldini élish qanun” lirini toluq ijra qilishni, Uyghur irqiy qirghinchiliqida jawabkarliqi bar bolghan téximu köp xitay emeldarlirigha jaza yürgüzüshni telep qilishining arqisidinla yollan'ghan.

Doklatta, xitayning tibet we Uyghur diyaridiki “Dinni xitaychilashturush” siyasitining mejburiy assimilyatsiyege yol échip, tibet we Uyghurlarning diniy hem medeniyet kimlikige jiddiy tehdit peyda qilghanliqi agahlandurulghan. Diniy erkinlikke xilapliq qiliwatqan xitay emeldarlirigha we hökümet apparatlirigha, bolupmu xitay kompartiyesi birliksep bölümi, xitayning jama'et xewpsizlik we dölet xewpsizlik tarmaqlirigha nishanliq jaza yürgüzüshni tewsiye qilghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.