Amérika kéngesh palata ezasi rubiyo xitay hökümitining chériklikini ashkarilash qanun layihesi sun'ghan

Amérikaning jumhuriyetchi kéngesh palata ezasi marku rubiyo amérika dölet mejlisige xitay kompartiyesi we uning rehberlirining chériklikini ashkarilash qanun layihesi sun'ghan. Melum bolushiche, “Xitay kompartiyesining yaman gherezlik tesirige taqabil turush qanuni-2024” namliq bu layihe amérika döletlik istixbarat bash diréktoridin “Xitay kompartiyesi rehberlirining mal-mülki, chériklik heriketliri we bashqa meqsetliri heqqide doklat teyyarlash we sunush” ni telep qilidiken.

Marku rubiyo 13-iyun küni shu munasiwet bilen élan qilghan bayanatida, “Kommunistik xitay bizning dölitimizning eng chong reqibi. Amérika xelqi béyjing yétekchilik qilidighan yéngi dunya tertipining murekkep ré'alliqini oylishi kérek. Meyli iqtisadiy, meyli ijtima'iy yaki herbiy jehettin bolsun, biz xitayning dölitimizni dunyawi yétekchi küch bolushtin mehrum qilish üchün künséri qutrawatqanliqini körüp turmaqtimiz” dégen.

Melum bolushiche, bu qanun layihesi maqullinip resmiy küchke ige bolghandin kéyinki 80 kün ichide, amérika döletlik istixbarat diréktori yaki uning wekilining awam palatasi istixbarat alahide komitéti bilen kéngesh palatasi istixbarat alahide komitétigha kélip, xitay kompartiyesi we uning rehberlirining chériklik xahishliri we bashqa yaman gherezlik qilmishlirigha da'ir tekshürüsh doklatidin melumat bérishi telep qilinidiken. Buning aldida yeni bu yil 5-ayda, marku rubiyo xitayning tashqiy péréwot monopoliyesige qarshi sunulghan yene bir qanun layihesini qollighan idi. “Xitayning tashqiy péréwot almashturushta ochuq-ashkara bolush qanuni” namliq bu layihe, amérikaning xelq'ara pul fondi teshkilatida turushluq wekilidin “Xitayning pul monopolisyesini yéqindin teqip qilishi” telep qilin'ghan. Marku rubiyo bu heqtiki bayanatida, amérika xelqini “Xitayning pul monopoliyesidin qoghdash üchün bu qanun layihesini qollighanliqi” ni bildürgen idi.