Марко рубийо: «трамп һөкүмити шинҗаң мәсилисидә хитайға күчлүк вә ениқ сигнал бәрди»

Мухбиримиз әркин
2019-10-09
Елхәт
Пикир
Share
Принт

Американиң җумһурийәтчи кеңәш палата әзаси, америка дөләт мәҗлиси хитай ишлири комитетиниң рәиси марко рубийо, америка сода министирлиқиниң уйғур аптоном районидики 20 дәк җ х оргини вә 8 хитай технологийә ширкитини қара тизимликкә алғанлиқини мәдһийәләп, трамп һөкүмитиниң хитайға күчлүк вә ениқ сигнал бәргәнликини билдүргән.

Марко рубийо бу йил язда америка сода министири велбор росқа хәт йезип, хитайниң дахуа, хәйкаң технологийә ширкәтлирини қара тизимликкә елишни, уйғур районида кишилик һоқуқни дәпсәндә қиливатқан хитай әмәлдарлириға ембарго қоюшни тәләп қилған 24 нәпәр кеңәш палата әзасиниң биридур.

У, 7‏-өктәбир елан қилған баянатида: «трамп һөкүмити американиң бейҗиңниң шинҗаңдики уйғур вә башқа диний, етник аз санлиқ милләтләргә қарши елип барған кәң көләмлик, системилиқ, қорқунчлуқ кишилик һоқуқ дәпсәндичиликидә хитай һөкүмити, коммунистик партийә вә униң ярдәмләшкүчилирини җавабкарлиққа тартидиғанлиқи һәққидә күчлүк вә ениқ сигнал бәрди» дәп тәкитлигән. У йәнә мундақ дегән: «хәйкаң, дахуа, шаңтаң технологийәсини өз ичигә алған бу хитай карханилири американиң дөләт бихәтәрликигә тәһдит селип кәлгән яки компартийәгә һәмкарлишип, униң шинҗаңда истибдат назарәт системиси қуруши вә заманиви дәврдики җаза лагерлирини бәрпа қилишиға ярдәмләшкән» дегән.

Америка сода министирлиқи 7‏-өктәбир күни уйғур аптоном районлуқ җ х назаритини өз ичигә алған 20 дәк йәрлик җ х оргини вә хитайниң хәйкаң, дахуа, шаңтаң, куаңше ширкәтлирини өз ичигә алған 8 технологийә карханисини қара тизимликкә киргүзгән. Бу ширкәтләр хитай һөкүмитиниң уйғур районида йүз тонуш аппаратлирини орунлаштуруп, дигитал истибдатлиқ системиси қуруши, лагерларни бәрпа қилишиға ярдәмләшкән, дәп әйиблинип кәлгәниди.

Пикирләр (0)
Share
Толуқ бәт