Marko rubiyo: “Tramp hökümiti shinjang mesiliside xitaygha küchlük we éniq signal berdi”

Muxbirimiz erkin
2019-10-09
Share

Amérikaning jumhuriyetchi kéngesh palata ezasi, amérika dölet mejlisi xitay ishliri komitétining re'isi marko rubiyo, amérika soda ministirliqining Uyghur aptonom rayonidiki 20 dek j x orgini we 8 xitay téxnologiye shirkitini qara tizimlikke alghanliqini medhiyelep, tramp hökümitining xitaygha küchlük we éniq signal bergenlikini bildürgen.

Marko rubiyo bu yil yazda amérika soda ministiri wélbor rosqa xet yézip, xitayning daxu'a, xeykang téxnologiye shirketlirini qara tizimlikke élishni, Uyghur rayonida kishilik hoquqni depsende qiliwatqan xitay emeldarlirigha émbargo qoyushni telep qilghan 24 neper kéngesh palata ezasining biridur.

U, 7‏-öktebir élan qilghan bayanatida: “Tramp hökümiti amérikaning béyjingning shinjangdiki Uyghur we bashqa diniy, étnik az sanliq milletlerge qarshi élip barghan keng kölemlik, sistémiliq, qorqunchluq kishilik hoquq depsendichilikide xitay hökümiti, kommunistik partiye we uning yardemleshküchilirini jawabkarliqqa tartidighanliqi heqqide küchlük we éniq signal berdi” dep tekitligen. U yene mundaq dégen: “Xeykang, daxu'a, shangtang téxnologiyesini öz ichige alghan bu xitay karxaniliri amérikaning dölet bixeterlikige tehdit sélip kelgen yaki kompartiyege hemkarliship, uning shinjangda istibdat nazaret sistémisi qurushi we zamaniwi dewrdiki jaza lagérlirini berpa qilishigha yardemleshken” dégen.

Amérika soda ministirliqi 7‏-öktebir küni Uyghur aptonom rayonluq j x nazaritini öz ichige alghan 20 dek yerlik j x orgini we xitayning xeykang, daxu'a, shangtang, ku'angshé shirketlirini öz ichige alghan 8 téxnologiye karxanisini qara tizimlikke kirgüzgen. Bu shirketler xitay hökümitining Uyghur rayonida yüz tonush apparatlirini orunlashturup, digital istibdatliq sistémisi qurushi, lagérlarni berpa qilishigha yardemleshken, dep eyiblinip kelgenidi.

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet