Сенатор марко рубийо: «биз хитайниң мусулман хәлқлиригә қиливатқан зулумиға қарши чоқум орнимиздин дәс турушимиз керәк!»

Мухбиримиз ирадә
2019-11-01
Елхәт
Пикир
Share
Принт

Америка кеңәш палатасиниң ғоллуқ әзалиридин марко рубийо «муһапизәтчи» гезитидә мақалә елан қилип, америка һөкүмитини вә шундақла һәрқайси демократик дөләтләр һөкүмәтлирини уйғурларға қаритиливатқан зулумни аяқлаштуруш үчүн йәниму көп тәдбир қоллинишқа чақирди.

У, 31-өктәбир күни «биз хитайниң мусулман хәлқлиригә қиливатқан зулумиға қарши чоқум орнимиздин дәс турушимиз керәк» мавзусида елан қилған мақалисидә уйғур елидики йеңи дәвр «йиғивелиш лагерлири» ичидә җинсий вә җисманий хорлаш, қейин-қистақ вә роһий искәнҗә қатарлиқ толиму қорқунчлуқ вәқәләр йүз бериватқанлиқини вә буниң дуняға кәң йосунда ашкарилиниши керәкликини билдүргән. 

У хитай һөкүмитиниң уйғур елидики уйғур, қазақ қатарлиқ мусулман милләтләргә қиливатқан муамилисиниң хитай компартийәсиниң өзидин үстүн туридиған һәрқандақ дин, һәрқандақ идийәни дүшмән билип, уни йоқитишқа һәрикәт қилидиған, сиясий вә мәдәнийәт җәһәттин мутләқ бойсундуруш үчүн вастә таллап олтурмайдиған тәбиитиниң нәтиҗиси икәнликини әскәрткән. У һазир уйғурларға қилиниватқан бу муамилиниң аста-аста хитайдики туңганларға, хиристиянларға кеңийиватқанлиқи буниң мисали, дәп көрсәткән. 

У мундақ дегән: «уларниң ахирқи нишани һәммини хитайлаштуруштур. Дини вә етник аз санлиқларни партийәниң тәстиқидин өткән, тар даирилик мәдәнийәт, идийә вә миллий нормларға игә кишиләргә айландуруштин ибарәт. Йәниму еғиррақ қилип ейтқанда, бу бир ген өзгәртиш қурулуши. Мана мушулар хитай һөкүмитиниң немә үчүн уйғур аяллирини аз пәрзәнт көрүшкә мәҗбурлайдиғанлиқини вә өз миллитидин болмиғанлар билән өйлинишкә мәҗбурлайдиғанлиқини изаһлап берәләйду.» 

Сенатор марко рубийо мақалиси давамида америка һөкүмитини йәниму җиддий тәдбирләрни елишқа дәвәт қилиш билән биргә йәнә хәлқара җамаәтни буниңға көз юмуп турувалмаслиққа, демократик дөләтләрдики сиясәтчиләрни орнидин дәс туруп, бу рәзилликкә тақабил турушқа чақирған.

Пикирләр (0)
Share
Толуқ бәт