Sénator marko rubiyo: "Biz xitayning musulman xelqlirige qiliwatqan zulumigha qarshi choqum ornimizdin des turushimiz kérek!"

Muxbirimiz irade
2019-11-01
Élxet
Pikir
Share
Print

Amérika kéngesh palatasining gholluq ezaliridin marko rubiyo "Muhapizetchi" gézitide maqale élan qilip, amérika hökümitini we shundaqla herqaysi démokratik döletler hökümetlirini Uyghurlargha qaritiliwatqan zulumni ayaqlashturush üchün yenimu köp tedbir qollinishqa chaqirdi.

U, 31-öktebir küni "Biz xitayning musulman xelqlirige qiliwatqan zulumigha qarshi choqum ornimizdin des turushimiz kérek" mawzusida élan qilghan maqaliside Uyghur élidiki yéngi dewr "Yighiwélish lagérliri" ichide jinsiy we jismaniy xorlash, qéyin-qistaq we rohiy iskenje qatarliq tolimu qorqunchluq weqeler yüz bériwatqanliqini we buning dunyagha keng yosunda ashkarilinishi kéreklikini bildürgen. 

U xitay hökümitining Uyghur élidiki Uyghur, qazaq qatarliq musulman milletlerge qiliwatqan mu'amilisining xitay kompartiyesining özidin üstün turidighan herqandaq din, herqandaq idiyeni düshmen bilip, uni yoqitishqa heriket qilidighan, siyasiy we medeniyet jehettin mutleq boysundurush üchün waste tallap olturmaydighan tebi'itining netijisi ikenlikini eskertken. U hazir Uyghurlargha qiliniwatqan bu mu'amilining asta-asta xitaydiki tungganlargha, xiristiyanlargha kéngiyiwatqanliqi buning misali, dep körsetken. 

U mundaq dégen: "Ularning axirqi nishani hemmini xitaylashturushtur. Dini we étnik az sanliqlarni partiyening testiqidin ötken, tar da'irilik medeniyet, idiye we milliy normlargha ige kishilerge aylandurushtin ibaret. Yenimu éghirraq qilip éytqanda, bu bir gén özgertish qurulushi. Mana mushular xitay hökümitining néme üchün Uyghur ayallirini az perzent körüshke mejburlaydighanliqini we öz millitidin bolmighanlar bilen öylinishke mejburlaydighanliqini izahlap béreleydu." 

Sénator marko rubiyo maqalisi dawamida amérika hökümitini yenimu jiddiy tedbirlerni élishqa dewet qilish bilen birge yene xelq'ara jama'etni buninggha köz yumup turuwalmasliqqa, démokratik döletlerdiki siyasetchilerni ornidin des turup, bu rezillikke taqabil turushqa chaqirghan.

Toluq bet