Америка кеңәш палата әзаси рубийо “шинҗаң доригәрлик ширкәтлири” ниң қара тизимликкә елинишини тәләп қилған

Америка кеңәш палатасиниң әзаси, “уйғур мәҗбурий әмгикиниң алдини елиш қануни” ниң тәклип лайиһәсини сунғучилардин бири болған марку рубийо, йеқинда америка ана вәтән хәвпсизлики министири алехандро майоркас билән америка федератсийә йемәклик вә дора башқуруш идарисиниң башлиқи роберт калифқа мәктуп йезип, хитайниң уйғур елидики икки доригәрлик ширкитини қарар тизимликкә елишни тәләп қилған.

Марку рубийониң мәктупи америкадики бир кишилик һоқуқ тәшкилатиниң бу йил 10-айниң башлирида доклат елан қилип, америка қанун чиқирип чәклигән болсиму, әмма америка дора башқуруш идарисиниң уйғур елидики икки хитай доригәрлик ширкитиниң мәһсулатлирини америкаға импорт қилишиға рухсәт қилғанлиқини ашкарилишиниң арқисидин йолланған.

Бу доклат, америка доригәрлик ширкәтлириниң хитай билән болған мунасивити америка дөләт мәҗлиси әзалириниң диққитини қозғиған, хитайниң америка әқлий мүлүклири вә сәзгүр санлиқ мәлуматлириға еришип, униң мәнпәәтигә бузғунчилиқ қилишидин әндишә қиливатқан бир пәйттә елан қилинған иди.

Марку рубийо мәктупта мундақ дегән: “‛уйғур мәҗбурий әмгикиниң алдини елиш қануни‚, америка хәлқигә сетивалған мәһсулатлириниң қуллар әмгикисиз ясалғанлиқиға капаләт бериду. Ениқки, федератсийә дора башқуруш идариси - FDA ниң назарәтчилик җәһәттики йетәрсизлики буни әмәлгә ашуралмиған. FDA Вә америка ана вәтән хәвпсизлики министирлиқиниң бу хәтәрлик хаталиқни түзитиш һәм қанунни қоғдаш мәсулийити бар. Мән һәр қайси тармақларниң вә мәҗбурий әмгәк хизмәт гурупписиниң ‛шинҗаң нозулин бийо-доригәрлик ширкити‚ билән вә ‛шинҗаң SEL бийо-хемийә ширкити‚ни дәрһал ‛уйғур мәҗбурий әмгикиниң алдини елиш қануни‚ ниң қара тизимликигә киргүзүшини тәләп қилимән.”

Америка ана вәтән хәвпсизлики министирлиқи техи өткән һәптә хитайниң хоңкоңни мәркәз қилған “йида тоқумичилиқ гуруһи” вә униң гуаңдуң билән турпандики икки тармақ ширкитини уйғур мәҗбурий әмгики сәвәбидин қара тизимликкә киргүзгән иди.