Amérika kéngesh palata ezasi rubiyo “Shinjang dorigerlik shirketliri” ning qara tizimlikke élinishini telep qilghan

Amérika kéngesh palatasining ezasi, “Uyghur mejburiy emgikining aldini élish qanuni” ning teklip layihesini sun'ghuchilardin biri bolghan marku rubiyo, yéqinda amérika ana weten xewpsizliki ministiri aléxandro mayorkas bilen amérika fédératsiye yémeklik we dora bashqurush idarisining bashliqi robért kalifqa mektup yézip, xitayning Uyghur élidiki ikki dorigerlik shirkitini qarar tizimlikke élishni telep qilghan.

Marku rubiyoning mektupi amérikadiki bir kishilik hoquq teshkilatining bu yil 10-ayning bashlirida doklat élan qilip, amérika qanun chiqirip chekligen bolsimu, emma amérika dora bashqurush idarisining Uyghur élidiki ikki xitay dorigerlik shirkitining mehsulatlirini amérikagha import qilishigha ruxset qilghanliqini ashkarilishining arqisidin yollan'ghan.

Bu doklat, amérika dorigerlik shirketlirining xitay bilen bolghan munasiwiti amérika dölet mejlisi ezalirining diqqitini qozghighan, xitayning amérika eqliy mülükliri we sezgür sanliq melumatlirigha ériship, uning menpe'etige buzghunchiliq qilishidin endishe qiliwatqan bir peytte élan qilin'ghan idi.

Marku rubiyo mektupta mundaq dégen: “‛Uyghur mejburiy emgikining aldini élish qanuni‚, amérika xelqige sétiwalghan mehsulatlirining qullar emgikisiz yasalghanliqigha kapalet béridu. Éniqki, fédératsiye dora bashqurush idarisi - FDA ning nazaretchilik jehettiki yétersizliki buni emelge ashuralmighan. FDA We amérika ana weten xewpsizliki ministirliqining bu xeterlik xataliqni tüzitish hem qanunni qoghdash mes'uliyiti bar. Men her qaysi tarmaqlarning we mejburiy emgek xizmet guruppisining ‛shinjang nozulin biyo-dorigerlik shirkiti‚ bilen we ‛shinjang SEL biyo-xémiye shirkiti‚ni derhal ‛Uyghur mejburiy emgikining aldini élish qanuni‚ ning qara tizimlikige kirgüzüshini telep qilimen.”

Amérika ana weten xewpsizliki ministirliqi téxi ötken hepte xitayning xongkongni merkez qilghan “Yida toqumichiliq guruhi” we uning gu'angdung bilen turpandiki ikki tarmaq shirkitini Uyghur mejburiy emgiki sewebidin qara tizimlikke kirgüzgen idi.