Sénator marko rubiyo "Uyghur mejburiy emgikining aldini élish qanun layihesi" ning awazgha qoyulmaywatqanliqini tenqidlidi

Muxbirimiz irade
2021-12-02
Share

Amérika kéngesh palata ezasi marko rubiyo "Uyghur mejburiy emgikining aldini élish qanun layihesi" ning awazgha qoyulmaywatqanliqini yene tenqidligen.

Sénator marko rubiyoning tiwittérdiki resmiy hésabidin tarqitilghan sin'gha qarighanda, u 1-dékabir küni amérika dölet mejliside qilghan sözide özi bash bolup tonushturghan we eyni chaghda meyli démokratlar bolsun yaki jumhuriyetchiler bolsun her ikki partiye ezalirining toluq qollishigha érishken bu qanun layihesining hazirghiche awam palatada awazgha qoyulmasliqining özini heyran qalduruwatqanliqini éytqan.

U mundaq dégen: "Uyghur musulmanliri a'ililiridin juda qilinip qullardek mejburiy emgekke séliniwatidu. Ular diniy-étiqadidin waz kéchishke, ismini özgertishke mejburliniwatidu, shundaqla mejburiy tughmas qiliniwatidu. Bu qilmishlar aqilane halda 'irqiy qirghinchiliq' dep ataldi. Buning bilen men 'Uyghur mejburiy emgikige qarshi turush qanun layihesi' ni tonushturup, Uyghurlarning mejburiy emgikige chétishliq herqandaq mehsulatning amérikagha kirishini chekleshni telep qildim. Bu layihe toluq awaz bilen kéngesh palatasidin ötti, emma awam palatada awazgha qoyulushni kütüp yatidu."

U bu layihe xelq'araliq chong shirketlerning menpe'etige taqashqanliqtin, ularning buninggha qarshi heriket qiliwatqanliqi éniq bolsimu, emma awam palatasining hazirghiche buni awazgha qoymasliqini "Chüshinish qiyin" dep tekitligen.

Marko rubiyo bu yil 18-yanwarda qilghan sözidimu özining baydin hökümiti sun'ghan "Mudapiye xamchot qanuni" ni ret qilidighanliqi, uning 4330-nomurluq "Uyghur mejburiy emgikining aldini élish qanun layihesi" ni öz ichige élishini telep qilidighanliqini bildürgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet