Marku rubi'o, téxnika mehsulatliri Uyghurlarni qiynashta ishlitilgen tyendi shirkitini chekleshni telep qildi

Muxbirimiz erkin
2022.12.02

Amérika kéngesh palata ezasi marku rubi'o 30-noyabir küni amérika tashqi ishlar ministiri bilinkén, maliye ministiri yéllén, soda ministiri raymondogha xet yézip, téxnika mehsulatliri Uyghur we bashqa musulman xelqlerni teqiblesh we qiynashta ishlitilgen xitayning tyendi téxnologiye shirkitini chekleshni telep qilghan. Marku rubi'o tyendi shirkitining téxnikisi Uyghur we bashqa musulman xelqlerni teqiblesh we qiynashta ishlitilipla qalmay, bu shirketning oxshash téxnikini yene iran hakimiyitige satqanliqini bildürgen. Rubi'oning éytishiche, ‍iran hakimiyiti bu téxnika mehsulatlirini iranliq tinch namayishchilargha qarshi ishletken bolushi mumkin iken.

Marku rubi'o xétide, yéqinqi doklatlar tyendi shirkitining xitay kompartiyesining teqiblesh tüzümini qollighanliqini ‍ashkarilighanliqi, bu, béyjingning sistémiliq kishilik hoquq depsendichilikige imkaniyet bergenlikini éytqan. U mundaq dégen: “Tyendi yene téxnikisini xitay xelq jumhuriyitining sirtidiki bashqa mustebit hakimiyetlerge éksport qilghan. Men sizni tyendining iran'gha qaritilghan kishilik hoquq jazasidiki iranni omumyüzlük jazalash, jawabkarliqqa tartish we yalghuz qaldurush qanuni, yershari magnitski qanuni we 2020-yilliq Uyghur kishilik hoquq siyasiti qanuni we bashqa alaqidar qanunlarda belgilen'gen shertlerge xilapliq qilghan-qilmighanliqigha qarap chiqishingizni telep qilimen”.

Marku rubi'oning éytishiche, tyendi kaméra we munasiwetlik sün'iy idrak yumshaq détallirini tetqiq qilghan, ishlepchiqarghan hem bazargha salghan bolup, bu kishilerning milliti we ‍irqini bayqaydighan yumshaq détalni öz ichige alidiken. Marku rubi'o xétide, xitay emeldarlirining tyendining téxnikisini ishlitip, “Shinjang Uyghur aptonom rayoni (XUAR) diki Uyghurlarni we asasliqi musulman bashqa milletlerni teqiplewatqanliqi we qiynawatqanliqi” ni éytqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.