Marko rubyo 2021-yilimu Uyghurlar mesilisi üchün küch chiqarmaqchi boldi

Yillardin buyan amérika dölet mejliside Uyghurlar mesilisini eng küchlük tekitlep kelgen kéngesh palata ezaliridin marko rubyo 23-dékabir küni özining 2021-yilliq xizmetlirige lazimliq meblegh we xirajetlerni képillikke ige qilghanliqini jakarlidi. Buningdin bir kün ilgiri bolsa u bu heqtiki meblegh uqturishini alqishlaydighanliqini bildürüp, buning bir qisimi Uyghurlar duch kéliwatqan ziyankeshlikning xaraktérini békitishke serp qilinidighanliqini bildürgenidi.

Marko rubyoning tor bétidiki uqturushta “Uyghurlar duch kéliwatqan paji'eler, bolupmu xitay kompartiyesining shinjangdiki insaniyetke qarshi jinayetliri heqqide hazir taghdek ispatlar yighilip boldi. Emdi amérika hökümitining bu heqte éniq qarar ‍élish peyti yétip keldi” déyilidu.

Uqturushta marko rubyoning 2021-yilida yene “Uyghurlarni mejburiy emgekke sélishni cheklesh qanuni” ning maqullinishi üchün küch chiqiridighanliqi, bolupmu bu xil mejburiy emgekning qaysi xaraktérdiki zulum bolidighanliqi heqqide qarar élishning zörürlüki alahide tekitlinidu. U bu heqte söz qilip “Xitay kompartiyesi 21-esirge we dunya démokratiyesige türlük jinayetler arqiliq xiris qiliwatidu. Shunga bu jehettiki xizmetni dawam qildurush nahayiti muhim” dégen.