Donald tramp marko rubiyoni yéngi nöwetlik hökümitining tashqi ishlar ministiri qilip teyinligen

13-Noyabir küni, amérikaning yéngi pirézidénti donald tramp kéngesh palata ezasi marko rubiyoni özining yéngi nöwetlik hökümitining tashqi ishlar ministiri qilip teyinligenlikini resmiy élan qildi.

Donald tramp bu heqte bergen bayanatida mundaq dégen: “Marko rubiyo hörmetke sazawer bir rehber, shundaqla u erkinlikning küchlük qoghdighuchisidur. U dölitimizning küchlük adwokati, ittipaqdashlirimizning heqiqiy dosti, shundaqla düshmenlirimiz qorqutalmaydighan bir jasaretlik jengchidur. Men marko bilen hemkarliship, amérika we dunyani qaytidin yükseldürüshni, shundaqla téximu bixeter qilip qurup chiqishni ümid qilimen!”

Donald tramp bayanatida marko rubiyoning muhim xizmetliri qatarida u bash bolup layihesini tüzgen we qanun bolup maqullan'ghan “Uyghur mejburiy emgikining aldini élish qanuni” ni alahide tilgha alghan. Bayanatta mundaq déyilgen: “Marko rubiyo 1971-yili filorida ishtatida tughulghan. Uning ata-anisi kubaliq köchmenlerdin bolup, dadisi ziyapet sorunlirida mulazimetchi bolup xizmet qilghan, apisi a'ile ayali hem méhmanxana xizmetchisi bolup ishligen. Rubiyo kichikidin bashlapla étiqad, a'ile, jem'iyet we shereplik bir xizmetning güzel turmush yaritishtiki ehmiyitini chüshen'gen. Rubiyoning siyasiy sahege kirishige kubaning kommunizm teripidin qandaq weyran qilin'ghanliqini öz közi bilen körgen bowisidin anglighanliri zor tesir körsetken.”

Rubiyo heqqidiki qisqiche chüshendürüshte yene, uning addiy a'ilidin kélip chiqqan biri bolush süpiti bilen, paytext washin'gtondiki kona siyasiy serxillar shekillendürgen terepbazliq we qutuplishish ötkelliridin muweppeqiyetlik ötüp, amérikadiki awam puqralarning hoquqini qoghdash we amérika arzusini eslige keltürüsh üchün xizmet qilghanliqi nuqtiliq tilgha élin'ghan.

Kéngesh palata ezasi marko rubiyo X arqiliq qayturghan inkasida, donald trampning özini bu wezipige layiq körgenliki we ishench qilghanliqidin ghururlan'ghanliqini bildürgen. Özining amérikaliqlarning menpe'eti üchün tiriship xizmet qilidighanliqini ipadiligen.

Marko rubiyoning amérika tashqi ishlar ministirliqigha körsitilgenliki jezmleshkendin kéyin, nurghun siyasiy erbablar we közetküchiler özlirining tebriklirini bildürüshken, shundaqla uning bu wezipige tolimu layiqliqini qeyt qilishqan.

“Xitay mesilisi boyiche xelq'ara parlaméntlar birleshmisi” (IPAC) mu marko rubiyoni tebrikligen. Ular tebrikide marko rubiyoning bu organning qurghuchi ezalirining biri ikenlikini tekitligen. Marko rubiyo xitay kompartiyesining tesirini cheklesh herikitining xelq'aralishishi üchün, bu organning qurulushigha shexsen özi yétekchilik qilghanliqi melum.