Доналд трамп америка кеңәш палата әзаси марко рубийони америка ташқи ишлар министири қилмақчи икән

Американиң 47-нөвәтлик пирезиденти болуп сайланған доналд трамп кәлгүсидә тәшкилләйдиған һөкүмитигә киридиған ғоллуқ әзаларни бир-бирләп ашкарилаватқан болуп, у америка дөләт мәҗлиси кеңәш палатаси әзаси марко рубийони американиң келәр нөвәтлик ташқи ишлар министири қилип тәйинлимәкчи болған.

“ню-йорк вақти гезити” 11-ноябир бу һәқтә хәвәр берип, қайта сайланған пирезидент трампниң филорида иштатидин болған кеңәш палата әзаси марко рубийони американиң ташқи ишлар министири қилиши мумкинликини елан қилған. Марко рубийо хитай, иран вә венезуелаға тутқан қаттиқ позитсийәси билән тонулған кеңәш палата әзаси болуп, хитайға қарши әң күчлүк җумһурийәтчиләрдин һесаблиниду.

2010-Йили американиң кеңәш палата әзаси болуп сайланған марко рубийо илгири пирезидент трампниң биринчи қарарлиқ һөкүмити мәзгилидила хитайға қарши кәскин мәйданини ипадиләп, хитайниң уйғурларға йүргүзүватқан қәбиһ җинайәтлирини қаттиқ әйиблигән. Марко рубийо қатарлиқлар хитайниң қәбиһ зиянкәшликигә учраватқан уйғурларни қоғдашқа мунасивәтлик “уйғур кишилик һоқуқ қанун лайиһәси” ни оттуриға қойған вә бу қанун 2020-йил 6-айда пирезидент трамп тәрипидин имзалинип рәсмий қанунға айланғаниди. Марко рубийо йәнә 2022-йил 6-айдин башлап иҗра қилинған “уйғур мәҗбурий әмгикиниң алдини елиш қануни” ниң мәйданға келиши вә  қанунға айлинишини баштин ахир қоллап кәлгән.

Марко рубийо трамп һөкүмити мәзгилидә хуавей ширкитигә һәр қандақ техникилиқ мәһсулатларни сетишни чәкләшни оттуриға қойған. Байден һөкүмити мәзгилидә болса, хитай ширкәтлиригә юқири техникилиқ мәһсулатларни сатмаслиқни, баш ширкити хитайда болған тик ток ширкитини чәкләшни тәшәббус қилған.

2020-Йил 8-айда хитай һөкүмити марко рубийо қатарлиқ 11 кишигә җаза йүргүзгәниди.

“һәптилик хәвәрләр” ториниң 12-ноябир бәргән хәвиридә ейтилишичә, бу қетимлиқ сайламниң алдида муавин пирезидент намзат болиду дәп қаралған марко рубийо, йәнила қайта сайланған пирезидент трамп юқири вәзипигә тәйинләшни пиланлиған намзат болуп кәлгән. Доналд трамп ахирқи пәйттә қарарини өзгәртмисила, марко рубийониң американиң келәр нөвәтлик ташқи ишлар министири болуши асасән ениқ икән. Америка дөләт мәҗлисидики бәзи демократлар марко рубийониң ташқи ишлар министири болуп тәйинлинишини қоллайдиғанлиқини билдүргән.