Donald tramp amérika kéngesh palata ezasi marko rubiyoni amérika tashqi ishlar ministiri qilmaqchi iken

Amérikaning 47-nöwetlik pirézidénti bolup saylan'ghan donald tramp kelgüside teshkilleydighan hökümitige kiridighan gholluq ezalarni bir-birlep ashkarilawatqan bolup, u amérika dölet mejlisi kéngesh palatasi ezasi marko rubiyoni amérikaning kéler nöwetlik tashqi ishlar ministiri qilip teyinlimekchi bolghan.

“Nyu-york waqti géziti” 11-noyabir bu heqte xewer bérip, qayta saylan'ghan pirézidént trampning filorida ishtatidin bolghan kéngesh palata ezasi marko rubiyoni amérikaning tashqi ishlar ministiri qilishi mumkinlikini élan qilghan. Marko rubiyo xitay, iran we wénézu'élagha tutqan qattiq pozitsiyesi bilen tonulghan kéngesh palata ezasi bolup, xitaygha qarshi eng küchlük jumhuriyetchilerdin hésablinidu.

2010-Yili amérikaning kéngesh palata ezasi bolup saylan'ghan marko rubiyo ilgiri pirézidént trampning birinchi qararliq hökümiti mezgilidila xitaygha qarshi keskin meydanini ipadilep, xitayning Uyghurlargha yürgüzüwatqan qebih jinayetlirini qattiq eyibligen. Marko rubiyo qatarliqlar xitayning qebih ziyankeshlikige uchrawatqan Uyghurlarni qoghdashqa munasiwetlik “Uyghur kishilik hoquq qanun layihesi” ni otturigha qoyghan we bu qanun 2020-yil 6-ayda pirézidént tramp teripidin imzalinip resmiy qanun'gha aylan'ghanidi. Marko rubiyo yene 2022-yil 6-aydin bashlap ijra qilin'ghan “Uyghur mejburiy emgikining aldini élish qanuni” ning meydan'gha kélishi we  qanun'gha aylinishini bashtin axir qollap kelgen.

Marko rubiyo tramp hökümiti mezgilide xu'awéy shirkitige her qandaq téxnikiliq mehsulatlarni sétishni chekleshni otturigha qoyghan. Baydén hökümiti mezgilide bolsa, xitay shirketlirige yuqiri téxnikiliq mehsulatlarni satmasliqni, bash shirkiti xitayda bolghan tik tok shirkitini chekleshni teshebbus qilghan.

2020-Yil 8-ayda xitay hökümiti marko rubiyo qatarliq 11 kishige jaza yürgüzgenidi.

“Heptilik xewerler” torining 12-noyabir bergen xewiride éytilishiche, bu qétimliq saylamning aldida mu'awin pirézidént namzat bolidu dep qaralghan marko rubiyo, yenila qayta saylan'ghan pirézidént tramp yuqiri wezipige teyinleshni pilanlighan namzat bolup kelgen. Donald tramp axirqi peytte qararini özgertmisila, marko rubiyoning amérikaning kéler nöwetlik tashqi ishlar ministiri bolushi asasen éniq iken. Amérika dölet mejlisidiki bezi démokratlar marko rubiyoning tashqi ishlar ministiri bolup teyinlinishini qollaydighanliqini bildürgen.