Майк помпейо: «германийә шинҗаңда тутқун қилинған бир милйондин артуқ мусулманға көңүл бөлүштә үлгә болди»

Мухбиримиз әркин
2019-06-03
Елхәт
Пикир
Share
Принт

Америка ташқи ишлар министири майк помпейо берлинда германийә ташқи ишлар министири хәйко маас билән ахбарат елан қилиш йиғини өткүзүп, германийәниң уйғурларға көңүл бөлүштә үлгилик рол ойниғанлиқини билдүргән.

Майк помпейо өткән һәптиниң ахирлири германийәдә зиярәттә болуп, германийә ташқи ишлар министири маас вә баш министир ангела меркел билән иран мәсилиси, русийә билән болған мунасивәтләр, хитай билән болған сода уруши, бихәтәрлик һәм хуавей ширкити мәсилиси қатарлиқ көп темиларда сөзләшкән.

Америка ташқи ишлар министирлиқиниң учурида көрситилишичә, майк помпейо ахбарат йиғинида мундақ дегән: «германийә хәлқи бихәтәрликкә, өз хәлқиниң шундақла дуняниң әркинликигә қанчилик әһмийәт беридиғанлиқини намаян қилип кәлди. Германийә хитай өктичилирини қарши елиш, шинҗаңдики бир милйондин артуқ мусулман тутқунларға вә башқа аз санлиқларға көңүл бөлүшкә чақириш җәһәтләрдә мәдәнийәтлик дөләтләргә үлгә яритип бәрди.»

Майк помпейониң илгири сүрүшичә, у германийәниң юқириқи мәсилиләрдә үлгилик рол ойнапла қалмай, хитайниң хиянәтчилик, җасуслуқ һәрикәтлиригә вә адаләтсиз сода қилмишлириға қарши туруш җәһәтләрдә йетәкчилик рол ойнишини үмид қилидикән. У йәнә маас билән хуавей вә 5г ул әслиһәләр қурулуши һәққидә музакирә елип барғанлиқини билдүрүп, «биз хуавей вә 5г ул әслиһәләр қурулушиниң қандақ хәтири барлиқиға қарита наһайити ениқ тонушта болдуқ» дегән.

Майк помпейониң зиярити дәл хитайниң муавин дөләт рәиси ваң чишән германийәни зиярәт қиливатқан вақитта елип берилған. Ваң чишән хитай һөкүмити милйонлиған уйғурни йиғивелиш лагерлириға қамап, 2‏-дуня урушидин кейинки әң еғир кишилик һоқуқ кризисини пәйда қилған бир мәзгилдә германийәгә йетип кәлгән иди. Германийә таратқулириниң хәвәр қилишичә, германийә йешиллар партийәсиниң парламент әзаси маргаретта бавзи ханим билән катерин гөриң екарт «франкфорд обзорчи» гезитидә мақалә елан қилип, германийә вә униң явропа иттипақидики һәқәмсайилириниң мәйли 30 йил бурунқи «тйәнәнмен қирғинчилиқи» да болсун яки һазирқи уйғурларға йүргүзүлүватқан бастуруш қилмишлирида болсун, җавабкарлиқи бар шәхсләрни җазалиши керәкликини тәкитлигән.

Пикирләр (0)
Share
Толуқ бәт