Mayk pompéyo: "Gérmaniye shinjangda tutqun qilin'ghan bir milyondin artuq musulman'gha köngül bölüshte ülge boldi"

Muxbirimiz erkin
2019-06-03
Élxet
Pikir
Share
Print

Amérika tashqi ishlar ministiri mayk pompéyo bérlinda gérmaniye tashqi ishlar ministiri xeyko ma'as bilen axbarat élan qilish yighini ötküzüp, gérmaniyening Uyghurlargha köngül bölüshte ülgilik rol oynighanliqini bildürgen.

Mayk pompéyo ötken heptining axirliri gérmaniyede ziyarette bolup, gérmaniye tashqi ishlar ministiri ma'as we bash ministir an'géla mérkél bilen iran mesilisi, rusiye bilen bolghan munasiwetler, xitay bilen bolghan soda urushi, bixeterlik hem xu'awéy shirkiti mesilisi qatarliq köp témilarda sözleshken.

Amérika tashqi ishlar ministirliqining uchurida körsitilishiche, mayk pompéyo axbarat yighinida mundaq dégen: "Gérmaniye xelqi bixeterlikke, öz xelqining shundaqla dunyaning erkinlikige qanchilik ehmiyet béridighanliqini namayan qilip keldi. Gérmaniye xitay öktichilirini qarshi élish, shinjangdiki bir milyondin artuq musulman tutqunlargha we bashqa az sanliqlargha köngül bölüshke chaqirish jehetlerde medeniyetlik döletlerge ülge yaritip berdi."

Mayk pompéyoning ilgiri sürüshiche, u gérmaniyening yuqiriqi mesililerde ülgilik rol oynapla qalmay, xitayning xiyanetchilik, jasusluq heriketlirige we adaletsiz soda qilmishlirigha qarshi turush jehetlerde yétekchilik rol oynishini ümid qilidiken. U yene ma'as bilen xu'awéy we 5g ul esliheler qurulushi heqqide muzakire élip barghanliqini bildürüp, "Biz xu'awéy we 5g ul esliheler qurulushining qandaq xetiri barliqigha qarita nahayiti éniq tonushta bolduq" dégen.

Mayk pompéyoning ziyariti del xitayning mu'awin dölet re'isi wang chishen gérmaniyeni ziyaret qiliwatqan waqitta élip bérilghan. Wang chishen xitay hökümiti milyonlighan Uyghurni yighiwélish lagérlirigha qamap, 2‏-dunya urushidin kéyinki eng éghir kishilik hoquq krizisini peyda qilghan bir mezgilde gérmaniyege yétip kelgen idi. Gérmaniye taratqulirining xewer qilishiche, gérmaniye yéshillar partiyesining parlamént ezasi margarétta bawzi xanim bilen katérin göring ékart "Frankford obzorchi" gézitide maqale élan qilip, gérmaniye we uning yawropa ittipaqidiki heqemsayilirining meyli 30 yil burunqi "Tyen'enmén qirghinchiliqi" da bolsun yaki hazirqi Uyghurlargha yürgüzülüwatqan basturush qilmishlirida bolsun, jawabkarliqi bar shexslerni jazalishi kéreklikini tekitligen.

Toluq bet