Майк пәнс хитайни кишилик һоқуқ дәпсәндичилики бойичә җазалаш һәққидә сигнал бәрмәктә

Мухбиримиз сада
2019-08-07
Елхәт
Пикир
Share
Принт

Американиң муавин президенти майк пәнс 5-авғуст күни америкадики уйғурлар, демократ хитай вәкиллири, христиан вә фалунгуң муритлири вәкиллирини ақ сарайға тәклип қилип, улар билән сөһбәттә болған иди. Сөһбәт җәрянида у трамп һөкүмитиниң уйғурлар мәсилисидә биваситә мәсулийити болған хитай әмәлдарлирини «йәр шари магнетиский қануни» бойичә җазалайдиғанлиқидин шәпә бәргән.

Америкадики хәвәр вә учур тор бекити болған аксийос(Axios) ториниң 6-авғусттики мунасивәтлик хәвиридә «хитайға ярдәм» тәшкилатиниң вәкили боп фуниң бу һәқтә бәргән мәлуматлири асасий салмақни игилигән. Униң билдүрүшичә, майк пәнс 5-авғуст күни униңға бу йил күз айлирида хитайни асасий тема қилған иккинчи қетимлиқ нутқини сөзләйдиғанлиқини, бу арқилиқ хитайдики диний әркинлик мәсилилиригә җаваб беридиғанлиқини ейтқан.

Хәвәрдә дейилишичә, боб фу майк пәнс билән көрүшкәндә униңға уйғур дияридики тутуп туруш лагериға четишлиқ әмәлдарлардин чен чүәнгони өз ичигә алған тоққуз нәпәр хитай әмәлдариниң тизимликини берип, уларға җаза қоллинишни тәләп қилған. Майк пәнс бу һәқтә кәскин ипадә билдүрмигән болсиму, әмма өзиниң бу мәсилини йеқиндин көзитидиғанлиқини билдүргән.

5-Авғусттики учришишқа америкадики уйғур кишилик һоқуқ қурулушиниң директори өмәр қанат әпәндиму алаһидә тәклип қилинған. Бу җәрянда у майк пәнскә уйғурларниң америка һөкүмитидин хитайниң уйғур елидики лагерлириға қарши конкрет тәдбир елишини җиддий үмид қиливатқанлиқини ейтқан. Майк пәнсму җавабән өзиниң уйғурларниң вәзийитини йеқиндин көзитиватқанлиқи, трамп һөкүмитиниң дини әркинлик мәсилисигә җиддий көңүл бөлгән бир һөкүмәт болуш сүпити билән хитайдики уйғур қатарлиқ милләтләр учраватқан бу муамилигә нисбәтән қандақ тәдбир елиш мәсилисидә давамлиқ издинидиғанлиқини ипадә қилған.

Пикирләр (0)
Share
Толуқ бәт