Майк помпейо хитайниң өз хәлқигә қарши сабиқ шәрқий германийәдәк методларни ишлитиватқанлиқини илгири сүрди

Мухбиримиз әркин
2019-11-08
Елхәт
Пикир
Share
Принт

Америка ташқий ишлар министири майк помпейо 8‏-ноябир күни германийә пайтәхти берлинда нутуқ сөзләп, хитайни йәнә тәнқид қилған.

У «берлин теми» өрүлгәнликиниң 30 йиллиқ хатирә күни һарписида сөзлигән нутуқида русийә, иран вә хитайни тәнқидләп, хитайниң өз хәлқигә қарши қолланған методлириниң «сабиқ шәрқий германийәликләргә алаһидә тонушлуқ» икәнликини тәкитлигән. Бу майк помпейониң йеқинқи бир қанчә күн ичидә хитайни 2‏-қетим қаттиқ тәнқид қилишидур. 

У техи 3 күн аввал баянат елан қилип, хитайни уйғур паалийәтчиләр вә лагер шаһитлириниң аилисигә зиянкәшлик қилмаслиққа чақирған. Майк помпйо баянатида лагер шаһити зумрәт давутниң дадисиниң йеқинда вапат болғанлиқини алаһидә тилға елип, «биз бейҗиңни йәнә бир нөвәт чәтәлләрдә яшаватқан уйғурларға қаратқан барлиқ тәһдит вә паракәндичиликлирини тохтитишқа, асассиз тутқун қилинған уйғурларни қоюп беришкә вә уларниң аилә тавабиатлири билән әркин алақидә болушиға йол қоюши вә тәсиргә учратмаслиққа чақиримиз,» дегән иди. 

Помпейо җүмә күни берлинда йәнә хитай компартийәсиниң «йеңи бир хил истибдатлиқ чүшәнчиси шәкилләндүриватқанлиқи» ни тәкитләп, германийәни агаһландурған. У германийәниң хитай алақә-технологийә ширкити хуавейниң әсваблирини ишлитип, 5‏-әвлад учур амбири тори қуруш пиланиниң зор тәһдит пәйда қилидиғанлиқини илгири сүргән. 

Майк понпео русийә һәққидә тохталғанда униң қошнилириға таҗавуз қиливатқанлиқи вә өктичиләргә суйиқәст қиливатқанлиқини тәкитләп, «биз селинмимизни иттипақдашлиримиз вә армийәмиздин башқа нәрсигә ишлитишни ойлап, хаталаштуқ» дегән. Ройтерс агентлиқиниң хәвәр қилишичә, помпейониң сөзи хитайниң наразилиқини қозғиған. Хитай ташқий ишлар министирлиқи помпейониң сөзлирини «наһайити хәтәрлик», бу униң «нийитиниң зиянлиқ икәнликини ашкарилап бериду,» дәп әйиблигән.

Пикирләр (0)
Share
Толуқ бәт