Mayk pompéyo xitayning öz xelqige qarshi sabiq sherqiy gérmaniyedek métodlarni ishlitiwatqanliqini ilgiri sürdi

Muxbirimiz erkin
2019.11.08

Amérika tashqiy ishlar ministiri mayk pompéyo 8‏-noyabir küni gérmaniye paytexti bérlinda nutuq sözlep, xitayni yene tenqid qilghan.

U “Bérlin témi” örülgenlikining 30 yilliq xatire küni harpisida sözligen nutuqida rusiye, iran we xitayni tenqidlep, xitayning öz xelqige qarshi qollan'ghan métodlirining “Sabiq sherqiy gérmaniyeliklerge alahide tonushluq” ikenlikini tekitligen. Bu mayk pompéyoning yéqinqi bir qanche kün ichide xitayni 2‏-qétim qattiq tenqid qilishidur. 

U téxi 3 kün awwal bayanat élan qilip, xitayni Uyghur pa'aliyetchiler we lagér shahitlirining a'ilisige ziyankeshlik qilmasliqqa chaqirghan. Mayk pompyo bayanatida lagér shahiti zumret dawutning dadisining yéqinda wapat bolghanliqini alahide tilgha élip, “Biz béyjingni yene bir nöwet chet'ellerde yashawatqan Uyghurlargha qaratqan barliq tehdit we parakendichiliklirini toxtitishqa, asassiz tutqun qilin'ghan Uyghurlarni qoyup bérishke we ularning a'ile tawabi'atliri bilen erkin alaqide bolushigha yol qoyushi we tesirge uchratmasliqqa chaqirimiz,” dégen idi. 

Pompéyo jüme küni bérlinda yene xitay kompartiyesining “Yéngi bir xil istibdatliq chüshenchisi shekillendüriwatqanliqi” ni tekitlep, gérmaniyeni agahlandurghan. U gérmaniyening xitay alaqe-téxnologiye shirkiti xu'awéyning eswablirini ishlitip, 5‏-ewlad uchur ambiri tori qurush pilanining zor tehdit peyda qilidighanliqini ilgiri sürgen. 

Mayk ponpéo rusiye heqqide toxtalghanda uning qoshnilirigha tajawuz qiliwatqanliqi we öktichilerge suyiqest qiliwatqanliqini tekitlep, “Biz sélinmimizni ittipaqdashlirimiz we armiyemizdin bashqa nersige ishlitishni oylap, xatalashtuq” dégen. Roytérs agéntliqining xewer qilishiche, pompéyoning sözi xitayning naraziliqini qozghighan. Xitay tashqiy ishlar ministirliqi pompéyoning sözlirini “Nahayiti xeterlik”, bu uning “Niyitining ziyanliq ikenlikini ashkarilap béridu,” dep eyibligen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.