Hindistandiki musulmanlar xitayni Uyghur "Medeniyet qirghinchiliqi" seweblik jawabkarliqqa tartishni telep qildi

Muxbirimiz erkin
2019-12-10
Élxet
Pikir
Share
Print

Hindistandiki musulmanlar 9‏-dékabir küni namayish qilip, b d t ni xitayning Uyghur "Medeniyet qirghinchiliqi" seweblik jawabkarliqqa tartishini telep qilghan.

"Hindu géziti" ning xewer qilishiche, hindistandiki raza akadémiyesi we pütün hindistan sünni ölimalar jem'iyiti hindistanning uttar pradesh shtatidiki madanpura bazirida pa'aliyet ötküzüp, xitayning Uyghurlarni basturushigha naraziliq bildürgen. Namayishchilar "Xitay bigunah Uyghur musulmanlirigha medeniyet qirghinchiliqi élip bérishni toxtat", "B d t xitaygha qarshi heriket qollansun" dégen lozunkilarni kötürüp, xitaygha naraziliq bildürgen.

Mezkur pa'aliyet Uyghur aptonom rayonluq hökümetning re'isi shöhret zakir béyjingda axbarat yighini ötküzüp, lagérlarni aqlighan oxshash künde élip bérilghan. Shöhret zakir xitay hökümiti "Kespiy terbiyelesh merkezliri" dep kéliwatqan lagérlardiki kursantlarning "Hemmisi oqush püttürgenliki" ni élan qilghanidi. "Hindu" gézitining bildürüshiche, madanpura baziridiki namayish sünniy musulmanlarning ataqliq ishani abduqadir jilani hezretlirining tughulghan künini xatirilesh pa'aliyitide élip bérilghan. Abduqadir jilani sünniy musulmanlirining birdek étirap qilishigha érishken bir ulugh zat bolup, hindistandiki musulmanlar her yili uni xatirilep kelgen.

"Julusé-gawsiye‏" dep atalghan bu pa'aliyet bu yil 9‏-dékabir ötküzülgenidi. "Hindu" gézitining bildürüshiche, raza akadémiyesining prézidénti muhemmet se'id nuri, Uyghurlar uchrawatqan basturushqa köz yumushning mumkin emeslikini bildürgen. U, "Bizning qérindashlirimizning diniy erkinlik hoquqi ret qilinmaqta. Siz musulmanlarning namaz oqushi, roza tutushini chekliyelmeysiz. Bu hindistan we dunyadiki bashqa barliq döletler birdek étirap qilghan négizlik hoquq. Xitay özini bu mes'uliyetning sirtida hésabliyalmaydu", dégen.

Toluq bet