“Shinjang wénboyüen” namidiki orun Uyghur diyaridin atalmish “Jungxu'a medeniyet izliri”ni tépish qurulushini bashlighan

Xitay taratqulirining xewirige qarighanda, Uyghur aptonom rayonluq hökümetke biwasite qaraydighan medeniyet yadikarliqliri tetqiqat yurti - “Shinjang wénboyüen” (ilgiriki nami “Küsen tetqiqat yurti”), shi jinpingning “Medeniyet yadikarliqlirini qoghdashni kücheytip, jungxu'a medeniyitini dunyagha yüzlendürüsh” chaqiriqigha awaz qoshup, xitayning en'eniwi medeniyitige warisliq qilish we uni Uyghur rayonigha singdürüsh qurulushini téximu kücheytishni bashlighan.

Bu süretlik xewerning qisqiche mezmunidin qarighanda, bu orun buningdin kéyin medeniyet yadikarliqlirini qézish xizmitini “Siyasiy mes'uliyet we tarixiy burch” qatarida körüp,  Uyghur rayonidin “Xitayning tarixiy izliri”ni tépip, bu yadikarliqlarni “Janliq ispat” qilip, 20-qurultay rohini chongqur yiltiz tartquzmaqchi iken.

Mezkur orundiki bir xadimining bildürüshiche, ular Uyghur rayonidin “Xen, tang dewridiki qalduqlarni tépip tetqiq qilish”ni, shundaqla “Her milletning bu rayonida bille yashap yughurulup ketkenliki”ni ispatlashni  hökümetning “Shinjangni tüzesh” xizmiti bilen birdek élip baridiken. Xitay hökümiti “Shinjang wénboyüen” namidiki bu orun'gha on milyon yüen meblegh salghan bolup, atalmish xitay medeniyitini qoghdash we xitay hékayilirini sözleshni bille élip baridiken.     

Xitay hökümiti bu xizmetni yene muzéy, medeniyet yadikarliqliri orunliri arqiliqla emes, belki yene xitaydiki dangliq aliy mektepler, ilmiy tetqiqat orunliri arqiliqmu ilgiri süridiken.

Arxé'olog we tarixchi qurban weli radiyomizning ziyaritini qobul qilghanda, Uyghur rayonining ayrim medeniyetke we musteqilliq tarixigha ige zémin ikenlikini, mustemlikichi xitayning emeliyette Uyghurlarning milliy, tarixiy éngini yoqitish üchün saxta tarix oydurup, uni Uyghur medeniyetining ornigha dessetmekchi boluwatqanliqini otturigha qoyghanidi.