Xitay hökümitining shtat sirtida mehelle komitéti xizmetchisi qobul qilishi diqqet qozghidi

Yéqinda herqaysi jaylardiki hökümet tor betliride shtat sirtida mehelle komitéti xizmetchisi qobul qilish heqqidiki élanlar köplep élan qiliniwatqan bolup, analizchilar buni “Téximu zor bir shumluqtin dérek béridu”, dep qarimaqta.

Melum bolushiche, qumul sheherlik hökümet sheherlik siyasiy-qanun komitétining tarmiqida shtat sirtida 17 xizmetchi qobul qilidighanliqi heqqide élan bérilgen. Bariköl nahiyelik hökümetning torida bolsa mehelle komitétining xizmiti üchün shtat sirtida xizmetchi qobul qilidighanliqini élan qilghan. Bu élanlarning hemmisidila iltimas qilghuchilarning “Wetenning birlikini söyidighan, milliy bölgünchilikke we qanunsiz diniy pa'aliyetke qarshi turidighan” bolushi shert qilin'ghan. Shuningdek iltimas qilghuchilarning éghizche we yazma imtihanlargha qatnishidighanliqi, bu imtihanlarning “Dölet tili” da bolidighanliqi alahide eskertilgen.

Xitay axbaratliridin melum bolushiche, hazir herqaysi jaylardiki “Terbiyelesh” xizmiti jiddiy kéngiyiwatqan bolup, bu xil “Terbiyelesh” nuqtilirigha baridighan kishilerni aldi bilen herqaysi jaylardiki ahaliler komitéti békitip chiqidiken. Andin siyasiy-qanun komitétining qarmiqidiki orunlar “Terbiyelep özgertish” ni ijra qilidiken.

Analizchilar bu heqte pikir qilip “Bu nöwettiki lagérlarning jiddiy zoriyiwatqanliqini biwasite eks ettüridighan yene bir ehwal,” dédi.