2019‏-Yili Uyghur aptonom rayoni xitaydiki paxta ishlepchiqirishida dawamliq asasliq orunni igiligen

Muxbirimiz erkin
2020-01-03
Élxet
Pikir
Share
Print

Uyghur aptonom rayonining paxta mehsulati rayondiki mejburiy emgekke baghlinishliq dep qattiq tenqidige uchrawatqan mezgilde mezkur rayonning paxta ishlepchiqirishi ötken yili dawamliq köpiyip, xitay paxta mehsulatining az kem 85 pirsentni igiligen.

Kishilik hoquqni qoghdighuchi teshkilatlar we mutexessisler xitay paxta toqumichiliq igilikining lagérlar bilen zich baghlinishliq ikenliki, da'irilerning lagérdiki yüz minglighan Uyghur, qazaq tutqunlirini Uyghur rayonining ichi we sirtidiki paxta toqumichiliq we kiyim-kéchek zawutlirida heqsiz yaki azraq ish heqqi bilen mejburiy emgekke séliwatqanliqini ilgiri sürüp, chet'el döletlirini bu zawut-karxanilirida ishlepchiqirilghan mehsulatlarni import qilmasliqqa chaqirip kelgen idi. 

Amérikadiki "Xitay puqralar küchi" teshkilatining ötken yili élan qilghan doklatida xitayning Uyghur lagér tutqunlirini mejburiy emgekke sélip, xelq'ara paxta toqumichiliq teminat zenjirini zeherligenlikini ilgiri sürgen. Lékin shinxu'a agéntliqining ashkarilishiche, Uyghur aptonom rayonida 2019‏-yili 5 milyon tonnidin artuq paxta ishlepchiqirilghan. Bu shu yili xitayda ishlepchiqirilghan omumi paxta mehsulatining 9. 84 Pirsentini igilep, xitayning asasliq paxta bazisi bolushni saqlap qalghan. 

Xitay döletlik istatéstika idarisining shinxu'a agéntliqigha bildürüshiche, 2019‏-yili Uyghur aptonom rayonida 54. 2 Milyon géktar yerge paxta térilghan bolup, bu shu yili xitayning memliket miqyasidiki omumiy paxtizarliqlirining 76 pirsentini igiligen. 

Uyghur kishilik hoquq pa'aliyetchilirining ilgiri sürüshiche, xitay hökümitining2017‏-yili bashlan'ghan keng kölemlik tutqunida lagérlargha qamalghan nurghun Uyghur déhqanlirining a'ile paxtizarliqi tartiwélinip, xitay köchmen paxtikarlirigha ötküzüp bérilgen. Buning bilen rayonda köchmen paxtikarlarning ilkidiki zor kölemlik paxtizarliqlar shekillen'gen. Uyghur aptonom rayonluq yéza-igilik nazariti shinxu'a agéntliqigha bergen uchurida, rayondiki bu paxtizarliqlarning 90 pirsentining mashinalashqanliqini ilgiri sürgen.

Toluq bet