Xitayning Uyghur mejburiy emgikining mehsuli bolghan yangaqni afriqa döletlirige éksport qiliwatqanliqi melum boldi

Muxbirimiz erkin
2021.01.22

Xitay shirketlirining Uyghur mejburiy emgikide ishlepchiqirilghan yangaq mehsulatlirini afriqa döletlirige éksport qiliwatqanliqi melum boldi. Melum bolushiche, xitayning “Körkem töge namliq méwichilik cheklik shirkiti” afriqigha yangaq éksport qiliwatqan shirketlerning biri iken. Yangaqchiliq kespi ilgiri jenubtiki Uyghur déhqanlirining muhim tirikchilik menbelirining biri idi. Biraq xitay hökümitining 2017-yili bashlan'ghan chong tutqunida Uyghurlar mejburiy emgek küchlirige aylandurulup, ulardin qalghan yangaqzarliqlar xitay shirketlirige ötküzüp bérilgen.

Yéqinda Uyghur ayal mejburiy emgek küchlirining bu shirketlerde yangaq chéqiwatqanliqigha da'ir sin körünüshliri ijtima'iy taratqularda tarqalghanidi. “Aqsu géziti” ning xewer qilishiche, “Körkem töge méwichilik cheklik shirkiti” marakeshlik bir sodiger bilen 120 tonna yangaq sétiwélish toxtami tüzgen bolup, uninggha teyyarlan'ghan yangaqlar 18-yanwar küni “Körkem töge shirkiti” ning uchturpan nahiyesidiki tarmaq ponkitida aptomobillargha qachilan'ghan. Bu shirket 2018-yili xotende tizimgha aldurulghanidi.

Közetküchilerning ilgiri sürüshiche, amérika, en'gliye, kanada qatarliq döletler xitayning Uyghur mejburiy emgek mehsulatlirini chekleshni kücheytkendin kéyin, xitay özining éksport nishanini uning bilen anche hésabliship ketmeydighan musulman döletlirige we afriqa ellirige qaratmaqtiken. Amérika tamozhna we chégra qoghdash idarisi yéqinda Uyghur élide ishlepchiqirilghan paxta we pemidur mehsulatlirini birdek chekligenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.