Amérika tamozhnasi Uyghur mejburiy emgek mehsulatlirining eng yéngi sanliq melumatini élan qildi

Washin'gtondin muxbirimiz erkin teyyarlidi
2024.02.05

Amérika chégra qoghdash we tamozhna idarisining yéqinda élan qilghan eng yéngi sanliq istatistikisidin melum bolushiche, “Uyghur mejburiy emgikining aldini élish qanuni” ijra qilinishqa bashlighan 2022-yili 6-aydin hazirghiche, 2865 dane yollanma Uyghur mejburiy emgikige chétishliq, dep qarilip amérikagha kirishi ret qilin'ghan.

Bu jeryanda jem'iy 6702 dane yollanma tutup tekshürülüp, uning üchtin bir qismidin köpreki qoyup bérilgen. Amérika chégra qoghdash we tamozhna idarisining sanliq melumatida, tutup tekshürülgen yollanmilarning yérimini dégüdek éléktronluq buyumlar teshkil qilidighanliqi, kiyim-kéchek, ayaq kiyim we toqumichiliq mehsulatlirining ikkinchi orunda, sana'et we ishlepchiqirish matériyallirining üchinchi orunda turidighanliqi körsitilgen.

Melum bolushiche, amérika tamozhnasida tutup tekshürülgen 6702 dane yollanmining 2671 danisi qoyup bérilgen bolup, yene 1166 dane yollanma tekshürülüsh basquchida iken.

Amérika tamozhnasi ötken hepte Uyghur mejburiy emgikige chétishliq kiyim-kéchek, ayaq kiyim we toqumichiliq mehsulatlirini amérikagha import qilishta wiyétnamning xitaydin éship ketkenlikini bildürgen. Adriyan zénzge oxshash mutexessisler, bu xitayning Uyghur mejburiy emgikige chétishliq mehsulatlarni ékisport qilishta sherqiy-jenubiy asiya döletlirini, bolupmu wiyétnamni qalqan qilip ishlitiwatqanliqidin dérek béridighanliqini éytqan. Lékin amérika chégra qoghdash we tamozhna idarisining qeyt qilishiche, Uyghur mejburiy emgikige chétishliq, dégen guman bilen chégrada tutup tekshürülgen mehsulatlarning kélish menbesi boyiche hésablighanda, malaysiya birinchi o‍runda turudiken. Sanliq melumatta kélish menbesi malaysiya bolghan mehsulatlarning qimmiti bir milyard 230 milyon dollar ikenliki qeyt qilinmaqta.

Amérika chégra qoghdash we tamozhna idarisi ötken hepte élan qilghan sanliq melumatida, 2023-yili kélish menbesi wiyétnam bolghan 10 milyon dollardin artuq kiyim-kéchek, ayaq kiyim we toqumichiliq mehsulatining Uyghur mejburiy emgikige chétilip amérikagha kirishi ret qilin'ghanliqini bildürmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.