“Büyük biritaniye énérgiye qurulushi qanun layihesi” Uyghur mejburiy emgikige chétilidighanliqi sewebidin maqullanmasliqi mumkin iken

En'gliyening emgek partiyesi hökümiti teripidin tüzüp chiqilghan “Büyük biritaniye énérgiye qurulushi qanun layihesi”, Uyghur mejburiy emgikige chétilidighanliqi sewebidin talash-tartish qozghawatqan idi.

En'gliyening “Muhapizetchi” (Guardian) gézitining xewirige qarighanda, en'gliye parlaméntining ezasi dawid alton (David Alton) bu qanun layihesige tüzitish kirgüzgen bolup, bu tüzitilgen layihening parlaméntta konsérwatiplar partiyesi we erkin démokratlar partiyesining qollishigha érishidighanliqi mölcherlenmektiken.

Tüzitish kirgüzülgen nusxa en'gliyening yéshil énérgiye qurulushi saheside qul emgiki bilen ishlepchiqirilghanliqi ispatlan'ghan xitay küntaxtisi bataréyesi we bashqa matériyallarni ishlitishini tosushni meqset qilidiken.

Dawid alton mundaq dégen: “Biz bu qanun'gha kirgüzülgen tüzitish arqiliq, en'gliyening héchqandaq ammiwi meblighining xitay kompartiyesi yürgüzüwatqan qulluqni ilgiri sürüshige ishlitilmeslikige, yéshil énérgiyege ötüsh tirishchanliqimizning kishilik hoquqni depsende qilmasliqigha kapaletlik qilmaqchi.”

“Büyük biritaniye énérgiye qurulushi” hökümet otturigha qoyghan ghayet zor tür bolup, u en'gliyening énérgiye ul eslihelirini ammiwi igidarchiliqqa özgertidighan hemde en'gliyeni “Nöl karbon qoyup bérish” ke yéqinlashturidighan muhim qedem iken. Emma quyash énérgiyesi bataréyelirining mutleq köp qismining xitayda Uyghur mejburiy emgiki arqiliq yasalghanliqini nezerde tutqanda, eger bu qanun layihesi özgertilmise u halda bu en'gliyening énérgiye sana'itining Uyghur qul emgikige tayinip hel bolidighanliqidin dérek béridiken.

En'gliyediki luk dé pulférd qatarliq kishilik hoquq qoghdighuchiliri muhapizetchi gézitige qilghan sözide buning qobul qilish mumkin bolmaydighan ehwalliqini bildürüshken.