Firansiyening dangliq tenterbiye buyumliri shirkiti Uyghur mejburiy emgikige chétilghan

Firansiyening “Dékatlon” (Decathlon) namliq dunyadiki dangliq tenterbiye buyumlirini parche sétish shirkitining Uyghur mejburiy emgikige chétilghanliqi ashkarilinip, firansiye taratqulirida qattiq ghulghula qozghighan. Melum bolushiche, dékatlonning xitayning chingdaw shehiridiki bir mal teminligüchisining “Shinjang paxtisi” ishlitidighanliqi we uning yéngisar nahiyesidiki mal teminligüchi shirkitining xitayning dölet hamiyliqidiki Uyghur emgek küchlirini yötkesh parogrammisigha ishtirak qilghanliqi melum bolghan. Xewerlerde, dékatlonning firansiye xelqi yaqturup sétiwalidighan marka türlirining biri ikenliki, uning dunyadiki 70 tin artuq dölette 1700 dukini barliqi qeyt qilinmaqta.

Melum bolushiche, firansiyening “Disclose” we “Firansiye 2” namliq ikki axbarat orni dékatlonni toqumichiliq mehsulati bilen teminleydighan “Chingdaw jifa guruhi” üstidin tekshürüsh élip barghan.

Bu tekshürüshke tetqiqatchi adriyan zénzningmu yardem qilghanliqi qeyt qilinmaqta. Adriyan zénz, linkdin ijtima'iy taratqu supisida élan qilghan bu heqtiki uchurida, özining matériyal menbelirini analiz qilish we tehqiqleshke qatnashqinini bildürgen. Adriyan zénzning körsitishiche, xitayning “Chingdaw jifa shirkiti” we yéngisar nahiyesige jaylashqan “Shinjang shirong shirkiti” Uyghur mejburiy emgikige chétishliq bolup, yoshurun tartilghan bir widiyoda shirket xadimi özlirining “Shinjang paxtisi” ishlitidighanliqini delilligen. Amérika “Döletlik waskétbol birleshmisi” NBA ning markisi bésilghan bezi buyumlarningmu, xitaydiki Uyghur mejburiy emgikige chétishliq bir shirkette ishlepchiqirilghanliqi melum bolghan.

“Firansiye agéntliqi” ning bildürüshiche, dékatlon shirkiti 6-féwral özlirining “Chingdaw jifa guruhi” bilen hemkarlashqanliqini étirap qilghan bolsimu, emma “Karxanimizda we qimmet ölchimi halqimizda her küni bir pütünlükke kapaletlik qilishqa, négizlik heqlerge hörmet qilishqa tirishiwatimiz” dégen. Bu shirketning tekitlishiche, dékatlon ishlitiwatqan paxtining hemmisi “Mejburiy emgekning barliq shekilliridin xaliy, eng mes'uliyetchan menbeler” teripidin teminlenmekte iken.