Әнглийәдики борнемос айропорти уйғур мәҗбурий әмгики билән бағланған икән

Тәкшүрүшләрдин мәлум болушичә, уйғур елидин әнглийәдики борнемос айропортиға келидиған йүк айропиланлири мәҗбурий әмгәк маллирини әнглийәгә тошуш билән четишлиқ икән.

5-Феврал, әнглийәдики “күндилик инкас” (Daily Echo) ториниң бу һәқтә елан қилған мәхсус хәвиридә дейилишичә, борнемос айропорти билән уйғур елидики мәҗбурий әмгәкниң бағлиниши қорқунчлуқ дәриҗигә йәткән. “қуллуққа қарши туруш хәлқара тәтқиқат түри” ниң мәсули клой кранстон (Chloe Cranston) буни муәййәнләштүрүп, “уйғур елидики мусулманлар аталмиш ‚қайта тәрбийәләш мәркәзлири‛ вә дунядики даңлиқ маркилар үчүн мал тәминлигүчиләрниң мәҗбурлиши астида ишләйду. Биз уйғур елидики мал тәминлигүчиләрниң аз дегәндә 5 йил яки униңдин көпрәк вақитта уйғур елидә чоңқур йилтиз тартқанлиқини вә у йәрдики мәҗбурий әмгәкниң инсанийәткә қарши җинайәт шәкилләндүргәнликини билимиз” дегән.

Хәвәрдә қәйт қилинишичә, әнглийә парламенти кеңәш палата әзаси давид алтон (David Alton) мәҗбурий әмгәк маллирини чәкләш һәққидики музакиридә, борнемос йүк айропиланлириниң уйғур елидин мәҗбурий әмгәк маллирини тошуватқанлиқини оттуриға қоюп: “әнглийә таможна әмәлдарлири үрүмчидин борнемос айропортиға тошуп келингән маллардин қанчисиниң уйғур мәҗбурий әмгики билән бағланмиғанлиқини тәкшүрүп көрди?” дегән.

Клойниң билдүрүшичә, америка һөкүмити уйғур елидин келидиған мәҗбурий әмгәк маллирини чәкләшни йилдин йилға күчәйткәндин кейин, уйғур елигә қатнайдиған әнглийә йүк айропиланлириниң йүки еғирлишип кәткән. Шуниң билән америкиға кирәлмигән маллар әнглийәгә кирип, әнглийәни хитайниң “әхләтханиси” ға айландуруп қойған.