En'gliyediki bornémos ayroporti Uyghur mejburiy emgiki bilen baghlan'ghan iken

Tekshürüshlerdin melum bolushiche, Uyghur élidin en'gliyediki bornémos ayroportigha kélidighan yük ayropilanliri mejburiy emgek mallirini en'gliyege toshush bilen chétishliq iken.

5-Féwral, en'gliyediki “Kündilik inkas” (Daily Echo) torining bu heqte élan qilghan mexsus xewiride déyilishiche, bornémos ayroporti bilen Uyghur élidiki mejburiy emgekning baghlinishi qorqunchluq derijige yetken. “Qulluqqa qarshi turush xelq'ara tetqiqat türi” ning mes'uli kloy kranston (Chloe Cranston) buni mu'eyyenleshtürüp, “Uyghur élidiki musulmanlar atalmish ‚qayta terbiyelesh merkezliri‛ we dunyadiki dangliq markilar üchün mal teminligüchilerning mejburlishi astida ishleydu. Biz Uyghur élidiki mal teminligüchilerning az dégende 5 yil yaki uningdin köprek waqitta Uyghur élide chongqur yiltiz tartqanliqini we u yerdiki mejburiy emgekning insaniyetke qarshi jinayet shekillendürgenlikini bilimiz” dégen.

Xewerde qeyt qilinishiche, en'gliye parlaménti kéngesh palata ezasi dawid alton (David Alton) mejburiy emgek mallirini cheklesh heqqidiki muzakiride, bornémos yük ayropilanlirining Uyghur élidin mejburiy emgek mallirini toshuwatqanliqini otturigha qoyup: “En'gliye tamozhna emeldarliri ürümchidin bornémos ayroportigha toshup kélin'gen mallardin qanchisining Uyghur mejburiy emgiki bilen baghlanmighanliqini tekshürüp kördi?” dégen.

Kloyning bildürüshiche, amérika hökümiti Uyghur élidin kélidighan mejburiy emgek mallirini chekleshni yildin yilgha kücheytkendin kéyin, Uyghur élige qatnaydighan en'gliye yük ayropilanlirining yüki éghirliship ketken. Shuning bilen amérikigha kirelmigen mallar en'gliyege kirip, en'gliyeni xitayning “Exletxanisi” gha aylandurup qoyghan.