Xelq'ara mupettishlik mulazimet shirketlirining Uyghur rayonidiki mejburi emgekke yardem qilmasliqi telep qilindi

Muxbirimiz erkin
2020-03-16
Élxet
Pikir
Share
Print

Amérikadiki "Ishchilar hoquqi birleshmisi" bilen "Kommunizm qurbanliri xatire fondi" xelq'ara mupettishlik shirketlirige mektup yézip, ularni Uyghurlarning mejburi emgekke sélinishigha yardem qilmasliqqa chaqirghan.

Yéqinda awstraliyediki bir tetqiqat orni xitayning Uyghurlarni mejburi emgekke sélip, dunyadiki dangliq markilargha mehsulat ishlepchiqiriwatqanliqini ashkarilighan.

Bezi dangliq markilarning bir qisim xelq'ara mupettishlik mulazimet shirketlirini yallap, bu zawut-karxanilarni tekshürüshni hawale qilghanliqi, ularning bezi zawutlarni tekshürüp, bu orunlarda mejburi emgek yoq, dep xulase chiqarghanliqi melum bolghanidi.

"Ishchilar hoquqi birleshmisi" ning ijra'iye diréktori skot nowa bilen gérmaniyelik Uyghurshunas, "Kommunizm qurbanliri xatire fondi" ning aliy derijilik tetqiqatchisi adré'an zénz 17 xelq'ara mupettishlik shirkitige mektup yézip, ularning Uyghurlar ishleydighan zawut-karxanilarda mupettishlik qilishini toxtitishini telep qilghan. Mektupta, bu shirketlerning "Shinjangdiki mejburi emgek pakitlirini yépip, xitay hökümiti we xitayning ichi-sirtidiki shirketlerning ortaq jinayet shérikige aylinip qalmasliqi" tekitlen'gen. Mektup, "Xelq'ara ijtima'iy jawabkarliq teshkilati", "Weritas byurosi", "Dunya mes'ul akiriditsiyelen'gen ishlepchiqirish teshkilati" qatarliq shirketlerge yollan'ghan.

"Ishchilar hoquqi birleshmisi" ning bildürüshiche, "Weritas byurosi" namliq mupettishlik shirkiti ilgiri xitay "Jowen kiyim-kéchek shirkiti" ning jélilyüzi nahiyesidiki zawutini tekshürüp, uningda héchqandaq mejburi emgek yoqluqini élan qilghaniken. Halbuki, shahitlarning guwahliqi we yerlik taratqularning xewerliride bu zawutning lagérdiki tutqunlarni yötkep ishletkenliki ilgiri sürülgen. Mektupta tekitlinishiche, Uyghur rayoni bek békinme bolup, mupettishlik shirketlirining heqiqiy ehwalni bilishi bek müshkül iken.

Toluq bet