Amérika Uyghur mejburiy emgikini chekleshning yenimu ünümlük yollirini izdimekte

Muxbirimiz irade
2023.04.20

“Wal-sitrit zhurnili” géziti özining eng yéngi xewiride amérikaning téximu qattiq tedbirler arqiliq, Uyghur mejburiy emgikige taqabil turmaqchi boluwatqanliqini xewer qilghan.

“Wal-sitrit zhornili” gézitining xewiride, 18-april amérika dölet mejliside ötküzülgen “Uyghur mejburiy emgikining aldini élish qanuni” ning yolgha qoyulush ehwali heqqidiki guwahliq anglash yighinida amérika dölet mejlisi ezalirining bu qanunni ijra qilishta hazirghiche qolgha kelgen netijiler we yene qanundiki boshluqlar heqqidiki pikir-tekliplerni anglighanliqini bayan qilghan. Uningda yene amérikaning téximu ünümlük tedbirler arqiliq, Uyghur mejburiy emgek mehsulatlirining amérika bazirigha kirishini chekleydighanliqini bildürgenliki tilgha élin'ghan.

Xewerde déyilishiche, shu künidiki guwahliq anglash yighinida “Uyghur mejburiy emgikining aldini élish qanuni” resmiy ishqa kirishken 10 aydin buyan amérika chégrasida 1 milyard 100 milyon dollargha yéqin malning tutup qélin'ghanliqi doklat qilin'ghan.

Yuqiriqi bu tereqqiyat amérika dölet mejlisi ezalirini xursen qilghan, biraq kéngesh palata ezasi jéf mérkléy: “Bu bir muweppeqiyet bolsimu, emma peqetla déngizdiki muz taghning körün'gen bir qismi. Bu qanun'gha ri'aye qilish, endizide burulushni telep qilidu. Bu qanun'gha emel qilmaywatqan yaki yochuqtin paydiliniwatqan shirketler jawabkarliqqa tartilishi kérek” dégen.

Xewerde yene mejburiy emgek bilen bulghan'ghan tawarlarni üchinchi dölet arqiliq amérika bazirigha kirgüzüwatqan ehwalmu tilgha élinip, amérika hökümitining bu mesilini hel qilishni wede qilghanliqi bildürülgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.