Xitay hökümiti Uyghur ‍élida mejburiy emgekni ottura-bashlan'ghuch mekteplerge kéngeytmekchi iken

Xelq'arada Uyghurlarni mejburiy emgekke sélish bilen eyiblinip kelgen xitay hökümiti mejburi emgekni Uyghur élidiki aliy we ottura-bashlan'ghuch mektep oqughuchilirighimu kéngeytishni qarar qilghan. Yerlik da'iriler bu yil 3-ayda jaylardiki aliy we ottura-bashlan'ghuch mekteplerge uqturush chüshürüp, oqughuchilarni “Emgek bilen terbiyeleshni kücheytish” ni telep qilghan idi. “Tengritagh” torining 3-may ashkarlishiche, da'iriler “Aptonom rayonning yéngi dewrdiki aliy we ottura-bashlan'ghuch mekteplerde emgek terbiyesini omumiyyüzlük kücheytishni emeliyleshtürüsh toghrisidiki pikir” namliq höjjitini élan qilghan.

Xitayning xelq'arada Uyghurlarni qul emgikige sélish bilen eyibliniwatqan bir peytte, yene rayondiki mektep oqughuchilirigha “Emgek terbiyesi” élip bérishni qarar qilishining sewebi melum emes. Bu bezi közetküchilerde da'iriler oqughuchilarni “Emgek terbiyesi” namida “Paxta üzüshke salamdu” dégen guman peyda qilghan. Chünki xitayning “Shinjang paxtisi” mejburiy emgekke chétishliq bolghanliqi üchün xelq'ara dangliq shirketlerning imbargosigha uchrap, rayondiki xitay toqumuchiliq karxanilirini qiyin ehwalgha chüshürüp qoyghan idi.

“Tengritagh” torning xewiride iytilishiche, Uyghur aptonom rayonning “Emgek terbiyesini omumiyyüzliük kücheytish toghrisidiki pikir” de “A'ile, mektep we jem'iyetning her qaysiy tereplirini birleshtürüp…xitaygha xas emgek ma'aripi berpa qilish üstide izdinish, zamaniwiy ma'aripning telipige uyghun emgek ma'arip sistémisi qurup chiqish” telep qilin'ghan.