Uyghur aptonom rayonluq da'iriler Uyghur mejburiy emgikining mewjutliqini yene inkar qilishqa urundi

Uyghur aptonom rayonliq hökümet 3-‍iyun béyjingda 10-qétimliq axbarat yighini ‍ötküzüp, Uyghur mejburiy emgikining mewjutliqini yene ‍inkar qilghan. Da'irilerning éytishiche, “Shinjangda az sanliq milletlerning mejburiy emgekke sélin'ghanliqi pütünley töhmet” iken. Ikki sa'et dawamlashqan yighin'gha hökümet emeldarlirini we atalmish sana'et sahesining wekillirini öz ‍ichige alghan 10 kishi qatnashqan.

“Jenubiy xitay etigenlik pochtisi” gézitining xewer qilishiche, yighinda hujum nishani amérikagha qaritilghan bolup, Uyghur aptonom rayonluq hökümetning bayanatchisi shuy guyshyang mejburiy emgek “Gherbtiki xitaygha qarshi küchler oynawatqan kozér” dégen.

Xewerde éytilishiche, yighinda da'iriler muxbirlargha aqsudiki “Xu'afu toqumichiliq zawuti” ning ishchisi ekber turaxunni ‍öz ichige ‍alghan 6 neper Uyghur ishchining wédiyosini qoyup bergen bolup, ular ‍özlirining mejburiy ishlewatqanliqini ret qilghan. “Xu'afu toqumichiliq shérkiti” Uyghurlarni mejburiy ‍shletkenliki seweblik amérikaning jazalishigha uchrighan idi.

Shu guyshyang, b d t emeldarlirining rayonni ziyaret qilip, “Heqiqi ehwalni öz közi bilen körüshini qarshi alidighanliqi” ni bildürgen bolsimu, biraq “Shinjangda mewjut bolmighan irqiy qirghinchiliq yaki mejburiy emgekni tekshürüshning héchqandaq asasi yoq” dégen. Xitay hökümiti b d t ning Uyghur élida cheklimisiz tekshürüsh ‍ilip bérishini ret qilip, uninggha izchil aldinqi shert qoyup keldi. Ötken qétim yawropa diplomatlirining Uyghur élini ziyaret qilip, ilham toxti bilen körüshüsh telipini ret qilghan idi.