Токйо олимпикидики бәзи ғәрб командилириниң “шинҗаң пахтиси” да ишләпчиқирилған кийимләрни кийгәнлики ашкариланди

Америка “шинҗаң пахтиси” ни чәклигән бир вақитта “шинҗаң пахтиси” ишлитидиған хитай ширкәтлириниң токйо олимпик мусабиқисидики бәзи ғәрб тәнтәрбийә командилирини кийим билән тәминлигәнлики вә уларға вакаләтчи болғанлиқи ашкариланди. Филиппин ABS-CBN ахбарат гуруһиниң хәвәр қилишичә, токйо олимпик мусабиқисидә “шинҗаң пахтиси” ишлитидиған аз дегәндә 5 хитай ширкити бу командиларни кийим билән тәминлигән вә уларға вакаләтчи болған.

Мәлум болушичә, улар вакаләтчи болған дөләтләр йеңи зеландийә, ‍сландийә, белгийә қатарлиқларни өз ичигә алидикән. Хәвәрдә йәнә бу ширкәтләрниң руминийә, силовенийә, украина, биразилийә олимпик комитети, германийә, иран, нигерийә әркәкләр васкетбол командиси вә сербийә аяллар командисиға вакаләтчи болғанлиқини билдүргән.

Мәлум болушичә, “пек тәнтәрбийә мәһсулатлири ширкити” шу хил хитай карханиларниң бири болуп, бу ширкәтниң иҗраийә директор рен җихуа бу йил 3-‍айда өзлириниң “әзәлдин шинҗаң пахтиси вә хитай пахтисини сетивелип кәлгәнлики”, “шинҗаң пахтисини қоллайдиғанлиқи” ни билдүргән шундақла “шинҗаң литәй йипәк йоли ширкити” билән имзалиған тохтамини елан қилған.

“шинҗаң литәй йипәк йоли ширкити” хитай һөкүмити билән бирлишип, уйғурларни мәҗбурий ишлитиш билән әйиблинип келиватқан ширкәтләрниң бири иди. Хәвәрдә ейтилишичә, хитайниң “анта тәнтәрбийә буюмлири ширкити” му шу хил карханиларниң бири икән. Хәвәрдә бу ширкәтниңму бу йил 3-айда давамлиқ “шинҗаң пахтиси” ни ишлитидиғанлиқини елан қилғанлиқи, униң 2018-йилдин бери хәлқара олимпик комитети хадимлириниң формисини тәминләп келиватқанлиқи билдүрүлгән.