Tokyo olimpikidiki bezi gherb komandilirining “Shinjang paxtisi” da ishlepchiqirilghan kiyimlerni kiygenliki ashkarilandi

• Muxbirimiz erkin
  2021-08-02

Amérika “Shinjang paxtisi” ni chekligen bir waqitta “Shinjang paxtisi” ishlitidighan xitay shirketlirining tokyo olimpik musabiqisidiki bezi gherb tenterbiye komandilirini kiyim bilen teminligenliki we ulargha wakaletchi bolghanliqi ashkarilandi. Filippin ABS-CBN axbarat guruhining xewer qilishiche, tokyo olimpik musabiqiside “Shinjang paxtisi” ishlitidighan az dégende 5 xitay shirkiti bu komandilarni kiyim bilen teminligen we ulargha wakaletchi bolghan.

Melum bolushiche, ular wakaletchi bolghan döletler yéngi zélandiye, ‍slandiye, bélgiye qatarliqlarni öz ichige alidiken. Xewerde yene bu shirketlerning ruminiye, silowéniye, ukra'ina, biraziliye olimpik komitéti, gérmaniye, iran, nigériye erkekler waskétbol komandisi we sérbiye ayallar komandisigha wakaletchi bolghanliqini bildürgen.

Melum bolushiche, “Pék tenterbiye mehsulatliri shirkiti” shu xil xitay karxanilarning biri bolup, bu shirketning ijra'iye diréktor rén jixu'a bu yil 3-‍ayda özlirining “Ezeldin shinjang paxtisi we xitay paxtisini sétiwélip kelgenliki”, “Shinjang paxtisini qollaydighanliqi” ni bildürgen shundaqla “Shinjang litey yipek yoli shirkiti” bilen imzalighan toxtamini élan qilghan.

“Shinjang litey yipek yoli shirkiti” xitay hökümiti bilen birliship, Uyghurlarni mejburiy ishlitish bilen eyiblinip kéliwatqan shirketlerning biri idi. Xewerde éytilishiche, xitayning “Anta tenterbiye buyumliri shirkiti” mu shu xil karxanilarning biri iken. Xewerde bu shirketningmu bu yil 3-ayda dawamliq “Shinjang paxtisi” ni ishlitidighanliqini élan qilghanliqi, uning 2018-yildin béri xelq'ara olimpik komitéti xadimlirining formisini teminlep kéliwatqanliqi bildürülgen.