Америка һөкүмити уйғур мәҗбурий әмгикини сода ишлиридики муһим өлчәм қилмақчи

Мухбиримиз әзиз
2021-08-10
Share

Уйғур диярида барғансери зор көләм еливатқан мәҗбурий әмгәкни чәкләш үчүн америка һөкүмити хитай билән түрлүк сода мунасивитидә болуп келиватқан америка ширкәтлириниң хитайдин мал импорт қилишиға қарита бәзи қаттиқ болған чәкләш тәдбирлирини йолға қоюш алдида икән. "вал ситрет журнили" гезитиниң 9-авғусттики хәвиридә ейтилишичә, хитай һөкүмити уйғур дияридики ғайәт зор кевәзликләрдә изчил давам қилдуруватқан мәҗбурий әмгәк әмәлийәттә дуняни тәминләватқан пахта мәһсулатлириниң зор бир қисмини тәшкил қилидиғанлиқи үчүн америка һөкүмити хитай һөкүмитиниң бу хилдики мәҗбурий әмгәк сиясити билән бағлинишлиқ болған мәһсулатларни импорт қилмаслиқни җиддий ойлашмақта икән. Буниңда йәнә пәмидур (шохла) мәһсулатлириму муһим салмақни игиләйдикән.

Хәвәрдә ейтилишичә, нөвәттә америка дөләт мәҗлисидә музакирә қилиниватқан "уйғур мәҗбурий әмгикини чәкләш қануни" дәл бу җәһәттики муһим қорал икән. "хәлқара әмгәк һәқлири бирләшмиси" ниң рәиси скот нова бу һәқтә сөз қилип "бу қанун лайиһәси америка таможниси үчүн күчлүк қорал болуп қалиду" дегән. Йәнә келип байдин һөкүмити хитай билән болидиған кәлгүси сода паалийәтлири үчүн йеңи сиясәт түзүш билән мәшғул болуватқанда бу қанун лайиһиси уйғурларни мәҗбурий әмгәккә селиш қилмишини чәкләштә муһим рол ойнайдикән. Америка қошма штатлириниң сода вәкили касерина тай бу һәқтә сөз қилип "бизниң меһнәткәшләрни мәркәз қилған сода сияситимиз уларниң һәқлирини тәңсиз сода вә кишилик һоқуқ дәпсәндичиликидин һимайә қилиш ролини ойнайду" дегән.

Хитай һөкүмити изчил уйғур дияридики мәҗбурий әмгәкни инкар қилип келиватқан болуп, хитайниң америкидики әлчиханиси бу һәқтә соралған соалларға қарита "шинҗаң мәсилиси пүтүнләй бизниң ички ишимиз. Америка һөкүмитиниң бу һәқтә сиясәт бәлгиләш һоқуқи йоқ" дегән.

Мәлум болушичә, йеқиндин буян уйғур дияридин чиқидиған пахта мәһсулатлири һәрқайси саһәниң зор диққитини қозғаватқан болуп, бу һәқтә техиму қаттиқ болған тәдбирләрниң елиниши еһтималға йеқин икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт