Amérika hökümiti Uyghur mejburiy emgikini soda ishliridiki muhim ölchem qilmaqchi

Muxbirimiz eziz
2021-08-10
Share

Uyghur diyarida barghanséri zor kölem éliwatqan mejburiy emgekni cheklesh üchün amérika hökümiti xitay bilen türlük soda munasiwitide bolup kéliwatqan amérika shirketlirining xitaydin mal import qilishigha qarita bezi qattiq bolghan cheklesh tedbirlirini yolgha qoyush aldida iken. "Wal sitrét zhurnili" gézitining 9-awghusttiki xewiride éytilishiche, xitay hökümiti Uyghur diyaridiki ghayet zor kéwezliklerde izchil dawam qilduruwatqan mejburiy emgek emeliyette dunyani teminlewatqan paxta mehsulatlirining zor bir qismini teshkil qilidighanliqi üchün amérika hökümiti xitay hökümitining bu xildiki mejburiy emgek siyasiti bilen baghlinishliq bolghan mehsulatlarni import qilmasliqni jiddiy oylashmaqta iken. Buningda yene pemidur (shoxla) mehsulatlirimu muhim salmaqni igileydiken.

Xewerde éytilishiche, nöwette amérika dölet mejliside muzakire qiliniwatqan "Uyghur mejburiy emgikini cheklesh qanuni" del bu jehettiki muhim qoral iken. "Xelq'ara emgek heqliri birleshmisi" ning re'isi skot nowa bu heqte söz qilip "Bu qanun layihesi amérika tamozhnisi üchün küchlük qoral bolup qalidu" dégen. Yene kélip baydin hökümiti xitay bilen bolidighan kelgüsi soda pa'aliyetliri üchün yéngi siyaset tüzüsh bilen meshghul boluwatqanda bu qanun layihisi Uyghurlarni mejburiy emgekke sélish qilmishini chekleshte muhim rol oynaydiken. Amérika qoshma shtatlirining soda wekili kasérina tay bu heqte söz qilip "Bizning méhnetkeshlerni merkez qilghan soda siyasitimiz ularning heqlirini tengsiz soda we kishilik hoquq depsendichilikidin himaye qilish rolini oynaydu" dégen.

Xitay hökümiti izchil Uyghur diyaridiki mejburiy emgekni inkar qilip kéliwatqan bolup, xitayning amérikidiki elchixanisi bu heqte soralghan so'allargha qarita "Shinjang mesilisi pütünley bizning ichki ishimiz. Amérika hökümitining bu heqte siyaset belgilesh hoquqi yoq" dégen.

Melum bolushiche, yéqindin buyan Uyghur diyaridin chiqidighan paxta mehsulatliri herqaysi sahening zor diqqitini qozghawatqan bolup, bu heqte téximu qattiq bolghan tedbirlerning élinishi éhtimalgha yéqin iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet