Uyghur diyaridiki mejburiy emgek heqqide birleshme chaqiriq élan qilindi

Uyghurlar diyaridin arqimu-arqidin melum boluwatqan delil-ispatlar hazir ghayet zor kölemdiki mejburiy emgekning pütkül Uyghur millitini nishan qiliwatqanliqini körsetmektiken. Ene shu xil ehwalgha qarita erkin dunyadiki on nechche puqrawiy teshkilat birleshme bayanat élan qilip “Amérika tamozhna we chégra mudapi'e idarisi” ning muweqqet bashliqi mark morganni bu mesilige téximu estayidil mu'amile qilishqa chaqirdi.

“Erkinlik birleshmisi”, “Dunyawiy emgek we adalet”, “Étiqadlar ara hemkarliq”, “Uyghur kishilik hoquq qurulushi”, “Dunya Uyghur qurultiyi” qatarliq on nechche teshkilat 31-awghust küni birleshme bayanat sheklide élan qilghan bu chaqiriqta xitay tewesidiki paxta toqumuchiliqi bilen baghlinishliq barliq halqilarning Uyghurlarni nishan qilghan “Zamaniwi qullar emgiki” bilen chétéishliq ikenliki tepsiliy delil-ispatlar bilen körsitildi. Shuningdek amérika qanunida bu xil “Mejburiy emgek” mehsulatlirining herqandaq shekilde amérika istémal bazirigha kirishi men'i qilinidighanliqi yene bir qétim eskertildi.

Birleshme bayanatta kiyim-kéchek sana'itini asas qilghan ishlepchiqirish we teminat zenjirining birdek Uyghurlarni mejburiy emgekke mehkum qiliwatqanliqi, Uyghurlargha qaritilghan depsendichlikning hazir bu xildiki mejburiy emgektin halqip mejburiy tughmas qiliwétish, dölet zorawanliqi we ghayet zor kölemdiki lagérlargha qamash qilmishi qatarliqlargha kéngeygenliki, amérika awam palatasining re'isi nensiy pélosi xanimning Uyghurlargha qaritilghan bu zorluq heriketlirini “Dunyaning kolléktip wijdanigha qaritilghan ghezeptur” dégenliki, aldinqi ayda 200 din artuq puqrawiy teshkilatning “Uyghurlarni mejburiy emgekke mehkum qilishqa xatime bérish” herikitini bashlighanliqi alahide tekitlinidu. Uyghur kishilik hoquq qurulushining diréktori ömer qanat bu heqte söz qilip “Emdi bu xil zor kölemlik mejburiy emgek hadisisige qarita konkrét heriketke ötüshning peyti yétip keldi” dégen. “Dunyawiy emgek we adalet” teshkilatining re’‍si jénnifir rosénbam bolsa “Amérika tamozhna qanuni” diki belgilimiler boyiche bu xildiki mejburiy emgek mehsulatlirini meyli qandaq dangliq marka bolushidin qet'iynezer birdek men'i qilish lazimliqini tekitlep “Hazir nurghunlighan dangliq markilar dollar toplashni kishilik hoquqni depsende qilishtin ewzel körüwatidu” dégen.

Melum bolushiche, amérika tamozhnisi xitaydin import qilin'ghan bir qisim towarlarni Uyghurlar diyaridiki mejburiy emgekke chétishliq, dep musadire qilghan. Bu xildiki chaqiriqlarning köplep otturigha chiqishi bolsa ashu xildiki musadire we cheklesh tedbirlirini téximu kücheytishni meqset qilidiken.