Уйғурларниң мәҗбурий әмгикигә четишлиқ болған японийә ширкәтлири бесимға дуч кәлгән

Мухбиримиз ирадә
2020-09-03
Елхәт
Пикир
Share
Принт

Японийәдики кишилик һоқуқ органлири уйғурларниң мәҗбурий әмгикигә четишлиқ япон ширкәтлиригә қаратқан бесимини күчәйткән.

Японийә аммиви таратқуси «NHK» ниң хәвәр қилишичә, һазир нурғун хәлқаралиқ органлар уйғур елидә йолға қоюлуватқан мәҗбурий әмгәк һәққидә күчлүк испатларни оттуриға қойғандин кейин, хәлқаралиқ ширкәтләр бу мәсилидә өз мәйданини ипадиләшкә мәҗбур болған.

Австралийәдики «ASPI» намлиқ тәтқиқат оргини уйғурларниң мәҗбурий әмгикигә четишлиқ дәп көрсәткән хәлқаралиқ шеркәтләр ичидә японийәгә тәвә 11 ширкәт бар болуп, японийәдики кишилик һоқуқ органлири бу ширкәтләргә бесим ишләткән.

Хәвәрдә ейтилишичә, японийәдики «нөвәттә кишилик һоқуқ» (Human Rights Now) намлиқ орган мухбирларни күтүвелиш йиғини уюштуруш вә шундақла японийә уйғур җәмийити билән бирликтә хәт әвәтиш қатарлиқ усуллар арқилиқ юқириқи бу 11 ширкәтни мәҗбурий әмгәк мәсилисидә изаһат беришкә чақирған. Улар японийә ширкәтлириниң мәҗбурий әмгәк мәсилисигә җиддий муамилә қилмайватқанлиқини тәнқид қилип: «бу йүз бериватқан кишилик һоқуқ дәпсәндичиликиниң интайин еғирлиқини нәзәрдә тутқанда қобул қилишқа болмайдиған әһвал,» дәп көрсәткән.

Шуңа бу орган һазир японийә ширкәтлириниң барлиқ тәминләш зәнҗирлири үстидин тәкшүрүш елип беришни тәләп қилғандин башқа йәнә, японийә һөкүмитини һәрқайси ширкәтләрни кишилик һоқуқ мәсилилиригә мунасивәтлик әйибләшләргә җаваб беришкә мәҗбурлайдиған бир қанун бекитип чиқишқа чақирған.

Пикирләр (0)
Share
Толуқ бәт