En'gliye parlaméntida küntaxta we litiyliq bataréye ishlepchiqirishtiki Uyghur mejburiy emgiki muzakire qilin'ghan

En'gliye parlaménti awam palatasining 5-séntebir küni ötküzülgen yighinida, xitayning küntaxta we tokluq aptomobil bataréyesi matériyalliridin polisilikon we litiy ishlepchiqirish sahesidiki Uyghur mejburiy emgiki munazire qilin'ghan. Xelq'ara parlaméntlar birleshmisining X ta élan qilghan uchurliridin melum bolushiche, 5-séntebir en'gliye awam palatasida en'gliye hökümitining yéshil énérgiye pilani muzakire qilin'ghanda, bezi parlamént ezaliri xitayning küntaxta we litiyliq bataréye ishlepchiqirish sahesidiki Uyghur mejburiy emgikini otturigha qoyup, hökümetning buninggha qarshi tedbir élishini telep qilghan. Yighinda palata ezasi iyan dunkan simit, mutleq zor salmaqtiki polisilikonning Uyghur ilida mejburiy emgek arqiliq ishlepchiqirilidighanliqi, hökümetning qullar emgikini cheklesh qanuni boyiche bu mehsulatlarni cheklesh üchün qandaq tedbir alidighanliqini sorighan.

Melum bolushiche, yighinda en'gliyening soda ishlirigha mes'ul dölet ministiri jonatan réynold, dankin simisning so'aligha jawab bérip, “Teminlesh zenjirining herqandaq bir halqisida…. Qullar emgikining bolmasliqini kütidighanliqi we telep qilidighanliqigha qet'iy kapalet bergen.” halbuki yighinda yene awam palata ezasi sarah shampiyon, hökümetning yéshil énérgiye teminlesh zenjirining Uyghur mejburiy emgikidin pütünley xali bolushigha kapaletlik qilishni telep qilghan. Sarah shampiyon mundaq dégen: “Shu nahayiti éniq höjjetleshkenki, xitayning shinjang Uyghur aptonom rayonida küntaxta teminlesh zenjiri nahayiti shermendilerche mejburiy emgekke tayanmaqta. Bu jayda xitay hökümiti milyonlighan Uyghur we türkiy musulmanlirini diniy we milliti sewebidin sistémiliq jazalawatidu.”

Sarah shampiyonning éytishiche, nöwette dunyadiki küntaxtigha ishlitiliwatqan polisilikonning 35 pirsenti Uyghur ilida ishlepchiqirilmaqta iken. U, en'giliyeningmu amérikigha oxshash küchlük qanun chiqirip, Uyghur mejburiy emgikide ishlepchiqirilghan yéshil énérgiye mehsulatlirini cheklishi kéreklikini éytqan.