Uyghur élidiki mejuriy emgekning merkizi dep qaralghan alte orun, xitayning “Ülgilik sana'et baghchisi” bolup bahalan'ghan

Xitay da'‍iriliri kishilik hoquq teshkilatliri teripidin “Mejuriy emgek bazisi” dep eyiblinip kéliwatqan bezi orunlarni “2021-Yilliq shinjang reqemlik iqtisad ülgilik baghchisi” dep bahalighan. Bu tizimlikke Uyghur élidiki mejburiy emgekke chétishliq aqsu toqumichiliq sana'iti baghchisini öz ichige alghan alte orun kirgüzülgen.

“Shinjang géziti” ning 7-séntebir ashkarlishiche, bu alte “Ülgilik iqtisad baghchisi” ürümchi yuquri we yéngi téxnikaliq tereqqiyat rayoni, shinjang yumshaq détal baghchisi rayoni, ghulja chégra iqtisad hemkarliq rayoni, qaramay bulut hésablash kespiy baghchisi we aqsu toqumichiliq sana'et baghchisi qatarliqlarni öz ichige alidiken.

Tizimliktiki “Aqsu toqumichiliq sana'iti baghchisi” xitayning Uyghur élidiki asasliq mejburiy emgek bazilirining biri, dep qarilip kelgen. Shu seweblik amérika hökümiti ötken yili bu “Sana'et baghchisi” gha jaylashqan “Xu'afu toqumichiliq shirkiti” ning mehsulatlirini chekligen. ‍Ötken yili ‍uchturpanliq Uyghur yash mir'adil hesen “Aqsu toqumichiliq sana'et baghchisi” da lagérdin élip kélin'gen 20 ming Uyghurning mejburiy emgekke sélinidighanliqini ashkarlighan. Radiyomiz kéyinrek mir'adil hesenning bergen uchurlirining toghra ikenlikini delilligen idi.

“Shinjang géziti” ning ashkarlishiche, nöwette “Aqsu toqumichiliq sana'et baghchisi” da ruyxetke aldurghan 546 karxana bar iken. Buning ichide kölemdin yuquri karxana 42 bolup, ularning yilliq ishlepchiqirish qimmiti 10 milyard yüendin ashqan. Bu sana'et baghchisi Uyghur élining mejburiy emgek merkezleshken toqumichiliq, kiyim-kéchek kespidiki “Üch sheherche, yette baghche, bir merkez” boyiche Uyghur élining jenubidiki tunji sheherchige aylan'ghan.