H&M شىركىتى ئۇيغۇرلارنى قۇل قىلىپ ئىشلەتكەن خىتاي زاۋۇتى بىلەن سودا ئالاقىسىنى ئۈزگەن

«جەنۇبىي خىتاي ئەتىگەنلىك خەۋەرلىرى» تورىنىڭ 15-سېنتەبىر خەۋەر قىلىشىچە، شىۋېتسىيەنىڭ دۇنياغا داڭلىق كىيىم-كېچەك شىركىتى H&M خىتاينىڭ يىپ ئىشلەپچىقىرىدىغان بىر زاۋۇتى بىلەن بولغان سودىسىنى ئاياغلاشتۇرغان؛ چۈنكى بۇ زاۋۇتنىڭ ئۇيغۇر رايونىدىكى مەجبۇرىي ئەمگەك بىلەن چېتىشلىقى بار ئىكەن. H&M شىركىتىنىڭ بىلدۈرۈشىچە، ئۇلار بۇنىڭدىن كېيىن ئۇيغۇر رايونىدىكى ھەر قانداق كىيىم-كېچەك زاۋۇتى بىلەن سودا قىلمايدىكەن، شۇنداقلا بۇ رايوندىن پاختا سېتىۋالمايدىكەن. ئۇيغۇر رايونى خىتاينىڭ ئەڭ چوڭ پاختا بازىسى بولۇپ، ئۇيغۇر رايونى ۋە ئىچكىرى خىتايدىكى نۇرغۇن كىيىم-كېچەك زاۋۇتلىرىنى خام ئەشيا بىلەن تەمىنلەيدىكەن.

خەۋەردە ئېيتىلىشىچە، بۇ يىل 3-ئايدا ئاۋسترالىيە ئىستراتېگىيە ۋە سىياسەت تەتقىقات مەركىزى ئېلان قىلغان دوكلاتتا، ئۇيغۇرلارنى قۇل ئورنىدا ئىشلەتكەن خىتاي زاۋۇتلىرىدىن مەنپەئەتلىنىۋاتقان شىركەتلەر ئىچىدە H&M شىركىتىمۇ بار دېيىلگەن بولۇپ، ئەنخۇيدىكى بىر يىپ ئىشلەپچىقىرىش زاۋۇتى بۇنىڭ مىسالى سۈپىتىدە كۆرسىتىلگەن. ئەمما H&M شىركىتى ئەنخۇيدىكى بۇ زاۋۇت بىلەن ئالاقىسى يوقلۇقىنى، جېجياڭ خۇافۇ رەخت زاۋۇتىنىڭ ئۇيغۇر رايونىدىكى سودىسى بىلەنمۇ چېتىشلىقى يوقلۇقىنى بىلدۈرگەن.