Yawropa ittipaqi xitayning Uyghurlarni mejburiy emgekke séliwatqanliqi seweblik “Mejburiy emgek” mehsulatlirini chekleydiken
Yawropa ittipaqi xitay hökümitining Uyghurlargha yürgüzüwatqan mejburiy emgek siyasitini közde tutup turup, mejburiy emgek asasida ishlepchiqirilghan mehsutlarni cheklimekchiken.
-
Muxbirimiz irade
2021-09-16 -
-
-
Yawropa ittipaqi xitay hökümitining Uyghurlargha yürgüzüwatqan mejburiy emgek siyasitini közde tutup turup, mejburiy emgek asasida ishlepchiqirilghan mehsutlarni cheklimekchiken.
Firansiye agéntliqining xewer qilishiche, yawropa ittipaqi komissiyonining re'isi ursula won dér léyén 15-séntebir küni parlaméntta qilghan nutuqida yawropa ittipaqining mejburiy emgek mehsulatlirini cheklesh üchün heriketke ötidighanliqini delilligen.
Ursula won dérléyén xanim nutqida mundaq dégen: “Yawropa ittipaqi yer shari xaraktérliq tijaretni qollisimu, biraq buni hergizmu kishilerning izzet-hörmiti we erkinliki bedilige yürüshtürüshke qarshi turidu. Nöwette mejburiy emgekke zorliniwatqan we uning tehditige uchrawatqan 25 milyon adem bar, biz bu kishilerning yawropadiki dukanlarda sétiliwatqan mehsulatlarni ishlepchiqirishqa mejburlan'ghanliqini hergiz qobul qilalmaymiz.”
Gerche ursula xanim nutuqida xitayning ismini ochuq tilgha almighan bolsimu, biraq xelq'ara axbarat organlirining xewerliride nöwette Uyghur mejburiy emgek mesilisining yawrupa ittipaqi bilen xitay arisidiki eng muhim témilarning biri ikenlikini tekitligen.
Melum bolushiche, mejburiy emgek asasidiki mehsulatlarni cheklesh heqqidiki bayanat yawropa komissiyonining re'isi ursula won dér léyénning yawropa ittipaqining yilliq doklat nutuqida qilghan sözidiki bir qanche muhim noqtilarning biri iken. Shuning bilen birge, ursula won dér léyénning parlaménttiki bayanati yawropa parlaménti siyasiyonlirining yawropa ittipaqining béyjinggha qattiq qol bolushi kéreklikidek meydanini toluq namayen qilip bergen bolup, yawropa ittipaqi hindi-tinch okyan rayoni, yérim ötküzgüch teminlesh zenjiri we korona wirusining tarqilish menbesige a'it mesililerde xitaygha keskin mu'amilide bolushni közlimektiken. Ursula xanimmu nutuqida yawropa ittipaqining dunyaning bashqa jaylirida, jümlidin hindi-tinch okyan rayoni we béyjingning “Bir belwagh bir yol” qurulushi rayonida riqabet xaraktérliq soda we ul eslihe alaqisi ornitishni pilanlighanliqini otturigha qoyghan.